Qyzylordada qoǵamdyq kólikterge jasandy ıntellekt júıesi ornatylyp jatyr
QYZYLORDA. KAZINFORM – Qyzylorda oblysynda jol qozǵalysy erejeleriniń buzylýyn avtomatty túrde tirkeıtin júıeler jedel járdem kólikterimen qatar qoǵamdyq kólikterge, onyń ishinde avtobýstarǵa ornatylyp jatyr.
Oblystyq polıtsııa departamentiniń málimetinshe, bul bastama jol júrý erejelerin buzý derekterin der kezinde anyqtaýǵa jáne jol-kólik oqıǵalarynyń aldyn alýǵa baǵyttalǵan.
– Ornatylǵan mobıldi aqparattyq-baǵdarlamalyq keshender jasandy ıntellektimen, ozyq kameralarmen jáne radarlarmen jabdyqtalǵan. Bul – jol qozǵalysyna qatysýshylardyń jaýapkershiligin arttyrýǵa baǵyttalǵan mańyzdy sharalardyń biri, – delingen habarlamada.
Óıtkeni jedel medıtsınalyq kómek qyzmetkerleriniń naýqasqa ýaqtyly jetýi adam ómirin saqtap qalýda sheshýshi ról atqarady. Sondyqtan júrgizýshilerdiń jol qozǵalysy qaǵıdalaryn saqtaýy, arnaıy maqsattaǵy kólikterdiń kedergisiz qozǵalýyna múmkindik berýi jáne jolda muqııat bolýy erekshe mańyzǵa ıe.
Tártip saqshylary qoǵamdyq kólikterdi mundaı júıelermen jabdyqtaý jolaýshylardyń qaýipsizdigin qamtamasyz etýge, jol-kólik oqıǵalarynyń týyndaý qaýpin tómendetýge jáne kólik qozǵalysynyń qaýipsizdigin nyǵaıtýǵa yqpal etedi dep esepteıdi.
Eske salaıyq, Almatyda iri júk kólikterin baqylaýdy qamtamasyz etý maqsatynda salmaqtyq jáne gabarıttik baqylaý júıelerin ornatý jumystary júrgiziledi.
