Qyzylordada qyzylsha juqtyrǵandardyń 75-80%-y ekpe almaǵan

QYZYLORDA. KAZINFORM — Qyzylorda oblysynda qyzylsha aýrýy boıynsha epıdemıologııalyq ahýal turaqsyz dep baǵalanyp otyr.

Ótken jyldyń qyrkúıegi men bıylǵy naýryz aıy aralyǵynda óńirde birde-bir vırýsty ınfektsııa tirkelmegen. Sáýir aıynan beri turǵyndar arasynda qyzylsha aýrýy qaıtadan beleń alǵan. 

— 2025 jyldyń 15 tamyzyna deıin 84 jaǵdaı laboratorııalyq jolmen anyqtaldy. Qyzylsha aýrýyna shaldyqqan naýqastardyń 78,8%-y — 1 men 14 jas aralyǵynda balalar. Biraq naýqastardyń 75-80%-y ártúrli sebeptermen ekpe almaǵan, — dedi oblystyq sanıtarııalyq epıdemıologııalyq baqylaý departamenti basshysynyń mindetin atqarýshy Álııa Ábdiqaıymova.

Asa qaýipti, ınfektsııalyq jáne parazıttik aýrýlar boıynsha jyldyń alǵashqy jartysyndaǵy epıdemıologııalyq ahýal turaqty. Profılaktıkalyq is-sharalar nátıjesinde 68 nozologııa boıynsha aýrý tirkelgen joq. 22 nozologııa boıynsha syrqattaný deńgeıi ótken jyldyń jartysymen salystyrǵanda tómen. 

— Vaktsına qoldanylatyn juqpaly aýrýlarǵa qarsy ujymdyq ımmýnıtet qalyptastyrý maqsatynda maqsatty toptaǵy balalardy profılaktıkalyq ekpemen qamtý kórsetkishi 95-100% aralyǵynda bolýy tıis. Bizdiń oblysta jospar asyra oryndaldy. Degenmen, qala, aýdandarda bul kórsetkishke qol jetkizbegender bar, — dedi Álııa Ábdiqaıymova.

Buǵan deıin habarlaǵanymyzdaı, Almaty qalasynda 2025 jyldyń 7 aıynda qyzylshanyń 263 jaǵdaıy tirkelgen.