Qyzylordada qyz-kelinshekter túkti kilemshe toqyp,quraq quraýdy úırendi
QYZYLORDA. KAZINFORM — Qyzylorda qalasyndaǵy Anaǵa taǵzym ortalyǵynda «OıýLike» atty is-shara uıymdastyryldy.
Jergilikti ismerler kásibı sheberlik alańynda yntaly qyz-kelinshekterge túkti kilemshe toqý, quraq quraý, kıizden etnostıldegi buıymdar jasaý, zamanaýı shopper tigýdiń qyr-syryn úıretti.
Ortalyqtyń baspasóz qyzmeti habarlaǵandaı, etnograf ǵalymdar, dızaınerler, kreatıvti kásipkerler men tarıhshylar qazaq oıý-órneginiń tarıhı negizderi, sán ındýstrııasy men dástúrli órnekterdiń qolónerdegi qoldanysy týraly oı-pikirlerin ortaǵa saldy. Basqosýǵa qazaq ornamentologııasynyń negizin qalaýshylardyń biri, etnograf, grafık-sýretshi, fılosof, mádenıettanýshy Eraly Ospanov qatysyp, jeke zertteý nátıjesin, tájirıbesin bólisti.
Qorqyt ata atyndaǵy Qyzylorda ýnıversıtetiniń professorlary men oblystyq tarıhı-ólketaný mýzeıiniń qyzmetkerleri, kreatıvti kásipkerler oıý-órnekterdiń ornymen qoldanylmaıtynyn, kommertsııalyq baǵytta burmalanatynyn, sımvolıkalyq máni saqtalmaıtynyn synǵa aldy.
— Ulttyq órnekti maǵynasyn joǵaltpaı, qazirgi zamanǵa saı beıimdep, sapaly materıaldarmen úılestirip tanymal etýge bolady. Órnek kıimde ǵana emes, logotıpte, sándik buıymdarda, halyqaralyq brendte de beınelenedi. Qazaqtyń ulttyq órnegin saqtap, sánge engizý — ult mádenıetin álemge tanytýdyń eń tıimdi joly, — dedi tehnıka ǵylymdarynyń kandıdaty, qaýymdastyrylǵan professor Lázzat Shildebaeva.
Kásipker Aıman Ábdi qazaqtyń ulttyq kıimin búgingi kúnniń tynysymen úılestirip, balalarǵa, jastar men eresekterge arnap «Qazaq brand» brendimen zamanaýı kıim úlgilerin tigip júr.
— Sán — syrtqy beıne ǵana emes, mádenıetimiz, tarıhymyz ben bolmysymyzdyń aınasy. Biz kıim arqyly urpaqqa kim ekenimizdi, qaıdan shyqqanymyzdy, qandaı qundylyqtardy dáripteıtinimizdi kórsete alamyz. Búginde sán ındýstrııasynda ǵalamdyq trendter óte jyldam ózgerip jatyr. Biraq biz úshin eń mańyzdysy — sol aǵymǵa ilesip qana qoımaı, ózimizdiń ereksheligimizdi, ulttyq oıý-órnekterimizdi, dástúrli elementterimizdi jańa úlgide kórsete bilý, — dedi ol.
Qolónershi, kásipker Qarlyǵash Іlıasova óz kollektsııasynan defıle ótkizip, oıýdy kıim men buıymǵa jabystyra salýdyń durys emes ekenin, ony tek tigip, kestelep salý keregin aıtty.
Dástúrli órnekterdi jańǵyrtý baǵytyndaǵy sharaǵa aýdandar men birqatar óńirden kreatıvti ındýstrııa jónindegi ókilder qatysyp, onlaın túrde tájirıbe almasty.
Buǵan deıin Mádenıet jáne aqparat mınıstri Aıda Balaeva kreatıvti ındýstrııany tsıfrlandyrýǵa arnalǵan Úkimet otyrysynda qolónershiler eń kóp shoǵyrlanǵan óńirlerdi atady.