Qyzylordada Qyrǵyzstan azamattary mingen avtobýs jolda qaldy

QYZYLORDA. KAZINFORM — Qyzylorda oblysynyń Qarmaqshy aýdanyndaǵy Aqjar aýylynan 10 shaqyrym qashyqtyqta Qyrǵyzstan-Reseı baǵytynda qatynaıtyn reıstik avtobýs júk kóligimen soqtyǵysty. Bul týraly oblystyq tótenshe jaǵdaılar departamentiniń baspasóz qyzmeti habarlady. 

Kólik tehnıkalyq aqaýǵa baılanysty qozǵalysyn jalǵastyra almady.

— Oqıǵa ornyna dereý jetken qutqarýshylar avtobýs ishinde Qyrǵyzstannyń 47 azamaty bar ekenin anyqtady. Onyń bireýi — bala. Qyzmetkerler barlyǵyn evakýatsııalap, jaqyn mańdaǵy jylytý pýnktine jetkizdi. Oqıǵa saldarynan eshkim zardap shekken joq, — delingen habarlamada. 

Atalǵan vedomstvo tótenshe jaǵdaı týyndaǵan kezde 112 nómirine habarlasýdy eskertti. 

Aıta keteıik, Qyzylorda oblysynda keshendi profılaktıkalyq is-sharalardyń kúsheıgenine qaramastan ótken jyly jol-kólik oqıǵalarynyń sany 47,9% (978-den 1446-ǵa) ósti.

Buǵan deıin Abaı oblysynda polıtsııa jolda qalǵan jolaýshylarǵa kómek kórsetkeni týraly jazdyq.