Qyzylordada qylmystyq qýdalaý organdarynyń 404 qyzmetkeri tártiptik jazaǵa tartyldy

QYZYLORDA. KAZINFORM — Qyzylordalyq prokýrorlar ótken jyly qylmystyq qýdalaý organdarynyń 152 sheshimin bekitýden jáne onymen kelisýden bas tartty. Buǵan sheshimderdiń azamattardyń konstıtýtsııalyq quqyǵyna tikeleı áser etýi túrtki bolǵan. 

Qadaǵalaý organy málimdegendeı, ýaqytsha ustaý abaqtysyna qamalǵan 55 adam prokýror qaýlysymen bosatyldy. 

— Qylmystyq qýdalaý organdaryna tergeý áreketteriniń tolyqtyǵyn qamtamasyz etý maqsatynda 1524 nusqaý, 110 usynys berildi. 404 qyzmetker tártiptik jaýapkershilikke tartyldy. Al 91 adamnyń is-áreketin saralaý týraly qaýlylarmen kelispedik. 36 qylmystyq is aqtaý negizinde toqtady, — dedi oblys prokýrory Rızabek Ojarov.

Azamattardyń konstıtýtsııalyq quqyqtary men bostandyqtarynyń tıimdi qorǵalýyn qamtamasyz etý baǵytynda kezekshi prokýrordyń senim telefony jumys istep tur. Ol arqyly táýlik boıy qońyraý qabyldanady.

Aıta keteıik, oblystyq polıtsııa buǵan deıin Qyzylorda oblysynda keshendi profılaktıkalyq is- sharalardyń kúsheıgenine qaramastan ótken jyly jol-kólik oqıǵalarynyń sany 47,9% (978-den 1446-ǵa) óskenin habarlady.