Qyzylordada bala densaýlyǵyna qaýipti oıynshyqtar anyqtaldy
QYZYLORDA. KAZINFORM – Qyzylorda oblysynda balalar men jasóspirimderge arnalǵan ónimderge monıtorıng júrgizildi.
Oblystyq sanıtarııalyq-epıdemıologııalyq baqylaý departamenti bıyl jarty jylda 38 synama satyp alyp, olardyń qaýipsizdik kórsetkishin Ulttyq saraptama ortalyǵy fılıalynyń zerthanasynda tekserdi.
- Baqylaý maqsatynda alynǵan taýardyń barlyǵy Eýrazııalyq ekonomıkalyq odaqqa múshe jáne basqa da shet memleketterde óndirilgen. Saraptama nátıjesinde 1 synamanyń tańbalanýy qoldanystaǵy tehnıkalyq reglament talaptaryna sáıkes kelmeıtini anyqtaldy. Ónimniń tańbalanýy – tutynýshy úshin mańyzdy aqparat kózi. Onda taýardyń ataýy, óndirýshi, quramy, paıdalaný jáne jas ereksheligi týraly, basqa da qajet aqparat kórsetilýi kerek. Sondyqtan tańbalaýǵa qoıylatyn talaptyń saqtalýy ónim qaýipsizdiginiń mańyzdy quramdas bóligi bolyp sanalady, - dedi departament basshysy Gúlmıra Syzdyqova.
Balalar jıi tutynatyn oıynshyqtyń qaýipsizdigi jiti nazarda. Óıtkeni oıyn kezinde bala ony qolymen ustap qana qoımaı, aýzyna salýy múmkin. Osy oraıda fızıkalyq jáne basqa da qaýipsizdik kórsetkishiniń talaptary qatań saqtalýy qajet.
- Tekserý barysynda jekelegen oıynshyqtardyń betki qabatynyń tegis emes, kedir-budyr, úshkir ekeni anyqtaldy. Mundaı kemshilikter balanyń terisin jaraqattaýy nemese densaýlyǵyna basqa da qaýip tóndirýi múmkin. Sondyqtan ata-analar men tutynýshylar oıynshyq satyp alarda onyń syrtqy túrine ǵana emes, qaýipsizdik talaptaryna sáıkestigine de nazar aýdarýy qajet, - dedi Gúlmıra Syzdyqova.
Departament basshysy ata-analarǵa ónimniń tańbalanýyn muqııat tekserýge, ónimniń syrtqy pishinine nazar aýdarýǵa, balanyń jasyna sáıkes kelmeıtin oıynshyqtarǵa jolamaýǵa, ónimdi zań talaptaryna sáıkes jumys isteıtin saýda oryndarynan satyp alýǵa keńes berdi.
Eske salaıyq, budan buryn Eýropalyq Odaq qytaılyq marketpleıs Temu-ǵa tsıfrlyq saýda erejelerin buzǵany jáne EO aýmaǵynda qaýipti taýarlar taratqany úshin 200 mln eýro aıyppul saldy.
