Qyzylordada keı ujymdar jumysqa ulttyq kıimmen baryp júr
QYZYLORDA. KAZINFORM — Qyzylordada birqatar eńbek ujymdary jumysqa jappaı ulttyq kıimmen baratyn bolǵan.

Sonyń biri — oblystyq tilderdi oqytý ortalyǵy. Munda 30 shaqty adam qyzmet etedi.
Ortalyq qyzmetkerleri biraz buryn klassıkalyq kıim úlgisin biryńǵaı kók tústi shapan men qamzolǵa aýystyrdy.

— Áriptesterim ulttyq qundylyǵymyzdy nasıhattaý maqsatynda jumys ornynda qazaqy naqyshtaǵy kıim kııýdi jalǵastyrýda. Bul bastama qazaqy dástúr men mádenıetti dáripteýge, ulttyq sana-sezimdi nyǵaıtýǵa baǵyttalǵan. Biz tek kıim úlgisimen erekshelenbeımiz. Sondaı-aq is-sharalar, ashyq sabaqtar men tárbıelik máni zor kezdesýler arqyly da ulttyq qundylyqtardy dáripteýge úles qosyp júrmiz, — deıdi ortalyq dırektory Martana Dáýletbaeva.

Qorqyt ata atyndaǵy Qyzylorda ýnıversıtetinde kóktemniń alǵashqy kúninen bastap Naýryz meıramyn ulyqtaý, ulttyq qundylyqtardy nasıhattaýǵa baǵyttalǵan is-sharalar jalǵasyp keledi.
Sonyń biri — 4-22 naýryz aralyǵyna belgilengen ulttyq kıim kúni. Oqý ornynyń qyzmetkerleri men stýdentteri kúndelikti ulttyq úlgide kıinip, Naýryz meıramynyń sánin keltirip júr.
— Jalpy ýnıversıtette Ulystyń uly kúni qarsańynda ǵana emes, ár juma ulttyq kıim kúni retinde belgilengen. Sońǵy eki jyldan beri bul úrdis oqytýshylar men stýdentter arasynda joǵary deńgeıde dáriptelip keledi, — dedi ýnıversıtettiń medıa ortalyǵynyń jetekshisi Nazerke Sharapadın.
Qazaqy naqyshta kıiný úrdisi oblys mektepterinde keń taralǵan. Qyzylorda qalasyndaǵy

A.Baıtursynuly atyndaǵy № 211 orta mektep ujymy da jappaı oıýly oqý formasyna kóshti.
— Birinshi synyp oqýshylary osy oqý jylynan bastap biryńǵaı ulttyq úlgide kıindi. Qazir olarǵa ilesip bastaýysh synyptar túgel derlik klassıkalyq úlgidegi ulttyq kıimmen sabaqqa qatysady. Al 1 naýryzdan bastap búkil ujym bir aı boıy ulttyq kıimmen júredi, — dedi mektep dırektory Aıjan Álimova.
Buǵan deıin habarlaǵanymyzdaı, shymkenttik dárigerler jumysqa ulttyq kıimmen kele bastady.