Qyzylordada kene oshaqtaryn zalalsyzdandyrýǵa bıýdjetten 257 mln teńgeden astam qarjy bólindi
QYZYLORDA. KAZINFORM – Qyzylorda oblysynyń jumyldyrý daıyndyǵy, aýmaqtyq jáne azamattyq qorǵanys basqarmasyna qarasty «Jumyldyrý daıyndyǵy jáne shuǵyl jumystar ortalyǵy» KMM Kongo-Qyrym gemorragııalyq qyzbasy boıynsha qolaısyz eldi mekenderde kenege qarsy zalalsyzdandyrý jumysyn turaqty túrde júrgizip keledi.
Oblystyq sanıtarııalyq-epıdemıologııalyq baqylaý departamentiniń málimetine súıensek, bul tizimde 74 eldi meken bar. Kóktemgi jáne kúzgi zalalsyzdandyrý jumysyn júrgizýge jergilikti bıýdjetten 257 mln teńgeden astam qarjy bólindi.
- Oblystyq veterınarııa basqarmasynyń deregine sáıkes jumys barysynda 431 myńnan astam mal, 21 myńnan astam mal qorasy, 705 sýat pen shańlaq zalalsyzdandyryldy. Bul maqsatta kenege qarsy joǵary tıimdilikke ıe «Tsıpertrın» eritindisi qoldanyldy. Kóktemgi kezeńdegi jumysty memlekettik satyp alý konkýrsynyń jeńimpazy atanǵan merdiger mekeme júzege asyrdy. Nátıjesinde zalalsyzdandyrý sharalarynyń ortasha tıimdiligi 97,8 paıyz boldy. Qazirgi kúni kúzgi kezeńdegi zalalsyzdandyrý jumysyna daıyndyq júrgizilip jatyr. Bul maqsatqa 106,9 mln teńge qarastyrylǵan, - delingen kásiporyn habarlamasynda.
Josparly profılaktıkalyq jumys óńirdegi epıdemıologııalyq ahýaldy turaqty ustap, asa qaýipti juqpaly aýrýlardyń taralý qaýpin tómendetýge múmkindik beredi.
Eske salaıyq, byltyr oblysta qolaısyz eldi mekender sany 111 bolatyn.
