Qyzylordada ken ornyna qatysty shaǵymnan keıin jer qoınaýyn paıdalanýshyǵa aıyppul salyndy
QYZYLORDA. KAZINFORM – Saýda jáne ıntegratsııa mınıstrligi Tehnıkalyq retteý jáne metrologııa komıtetiniń Qyzylorda oblysy boıynsha departamenti «Krıstall Menedjment» aktsıonerlik qoǵamyn jospardan tys tekserdi.
Tekserýge Aqshabulaq ken ornyndaǵy gaz shyǵynyn esepke alý júıesindegi yqtımal buzýshylyqtar týraly aryz túrtki boldy.
– Tekserý barysynda kompanııa paıdalanatyn gaz shyǵynyn ólsheý júıesi, ıaǵnı esepke alý torabynyń mindetti metrologııalyq attestattaýdan ótpegeni jáne ólshem birligin qamtamasyz etý júıesiniń memlekettik tizimine engizilmegeni anyqtaldy. Zańnamaǵa sáıkes mundaı júıeler mindetti túrde tekserilýi jáne tirkelýi kerek. Olardy tıisti rásimdersiz paıdalaný taýarlyq gazdyń kólemin ólsheý dáldigine kúmán týǵyzýy jáne baqylanbaıtyn shyǵynǵa ákelýi múmkin, – delingen departament habarlamasynda.
Tekserý qorytyndysynda «Ólshem birligin qamtamasyz etý týraly» zań talabynyń buzylǵany anyqtaldy. Kompanııaǵa ákimshilik jaýapkershilik retinde 670 myń teńgeden astam aıyppul salyndy jáne anyqtalǵan zańbuzýshylyqtardy joıý týraly nusqama berildi.
Aıta keteıik, buǵan deıin Mańǵystaýda burǵylaý jumystary kezinde ekologııalyq zań buzý anyqtaldy.
