Qyzylordada qazanjappaı ázirleýden saıys ótti
QYZYLORDA. KAZINFORM – Qyzylorda oblysynyń Syrdarııa aýdanynda jergilikti áıel-analar arasynda qazanjappaı daıyndaýdan saıys ótti.
Іs-sharany aýdandyq qoǵamdyq damý bóliminiń qoldaýymen «Syrdarııa aýdanynyń áıelderi» qoǵamdyq birlestigi, aýdandyq áıelder keńesi jáne A.Toqmaǵambetov aýyldyq klýby uıymdastyrdy.
Saıysqa on shaqty áıel qatysyp, umytylyp bara jatqan ulttyq asty ázirleýdiń ádis-tásilderin kórsetip, dastarqan mádenıetin nasıhattady. Onyń arasynda jasy seksenge taıaǵan keıýana da bar.
A.Toqmaǵambetov aýylynan qatysqan Orynbasar áje Úmbetova kelinimen birge kópshilikke ulttyq asty ulyqtap, saıys nátıjesinde 2-oryndy jeńip aldy.
Al 1-oryndy belsendiligimen kózge túsken Aqjarma aýylynyń turǵyny Nursáýle Erimbetova ıelendi. Saýynshy bolyp eńbek etetin ol as as ázirleýdi bala kúninde anasynan úırengen.
- Ásirese, qazanjappaı pisirýdi sheber meńgerip, búginde sol dám men dástúrdi qyzdaryma úıretip kelemin. Onyń dámi men daıyndaý tásili ózgeshe. Qazanjappaı qazanda arnaıy ádispen daıyndalady, óte dámdi. Ár úıdiń óz ereksheligi men dámi bolady. Sondyqtan barlyq qazanjappaı birdeı deýge kelmeıdi, - dedi ol.
Saıystyń 3-orny Amangeldi aýylynyń turǵyny Raıhan Medeýovaǵa buıyrdy. Júldegerler men ózge de qatysýshylarǵa dıplom, alǵys hattar men baǵaly syılyqtar tabystaldy.
Buǵan deıin Qyzylorda qalasyndaǵy Anaǵa taǵzym ortalyǵynda «OıýLike» atty is-shara uıymdastyrylǵan bolatyn.
