Qyzylordada qazan aıynda 83 mln eýrolyq Roca zaýytynyń qurylysy bastalady
ASTANA. KAZINFORM - Qazaqstan Respýblıkasy Premer-mınıstriniń birinshi orynbasary Nurlybek Nálibaev «Roca Group» kompanııasynyń ókilderimen Qyzylorda oblysynda sanıtarlyq-tehnıkalyq ónim óndirý jáne qurastyrý jónindegi joǵary tehnologııalyq zaýyt salý jobasyn júzege asyrý máseleleri boıynsha kezdesti.
Úkimettiń baspasóz qyzmetiniń habarlaýynsha, Roca Group — sanıtarlyq-tehnıkalyq buıymdar men oǵan qatysty jabdyqtardy óndiretin álemdegi eń iri kompanııalardyń biri.
2025 jylǵy maýsymda Qazaqstan Respýblıkasy Premer-mınıstriniń Roca Group basshylyǵymen kezdesýi barysynda ınvestıtsııalyq jobany júzege asyrý qaǵıdattary týraly negizdemelik kelisimge qol qoıyldy.
Keıingi kezeńde joba odan ári damydy, kompanııanyń ınvestıtsııa kólemi bastapqyda málimdelgen 70 mln eýrodan 83 mln eýroǵa deıin artty. Qazaqstan Respýblıkasynyń Úkimeti, Qyzylorda oblysynyń ákimdigi jáne ınvestor arasynda qajetti memlekettik qoldaý sharalaryn kózdeıtin Investıtsııalar týraly kelisimge qol qoıyldy.
Qazirgi ýaqytta bolashaq zaýyttyń dızaıny men eskızdik jobasyn ázirleý aıaqtaldy, ony odan ári jobalaý jalǵasýda. Sonymen qatar Qyzylorda oblysynda ınstallıatsııalyq júıeler men aralastyrǵyshtardy qurastyrý óndirisin iske qosý boıynsha jumystar júrgizilip jatyr.
Kásiporynnyń óndiristik qýaty jylyna 500 myń dana deńgeıinde bolady dep josparlanǵan, sonymen qatar keleshekte óndiris kólemin 1 mln danaǵa deıin arttyrý múmkindigi qarastyrylǵan. Joba aıasynda shamamen 300 turaqty jumys ornyn ashý josparlanyp otyr. Ónim Qazaqstannyń ishki naryǵyna jetkizilip, Ortalyq Azııa elderine eksporttalady.
Kezdesý barysynda jobalyq qujattamany memlekettik saraptamadan ótkizý, sanıtarlyq-tehnıkalyq ónimder salasyndaǵy normatıvtik bazany jetildirý, Roca ónimderiniń el aýmaǵynda salynyp jatqan jáne júzege asyrý josparlanǵan nysandarda qoldanylýyn qamtamasyz etý máseleleri de qaraldy.
Nurlybek Nálibaev zaýytty ýaqtyly iske qosýdyń jáne otandyq taýar óndirýshige jan-jaqty qoldaý kórsetýdiń mańyzdylyǵyn atap ótti.
-Kezdesý qorytyndysy boıynsha memlekettik organdar men múddeli uıymdarǵa ınvestordy súıemeldeý, memlekettik saraptamadan jedel ótýin qamtamasyz etýdi jáne zaýyt qurylysyn 2026 jylǵy qazan aıynda bastaýdy tapsyrdy,-delingen habarlamada.
Osyǵan deıin Qazaqstan men Germanııanyń ónerkásiptik kooperatsııany kúsheıtetini týraly jazdyq.
