Qyzylordada qaza tapqan jasóspirimniń týystary beınebaqylaý jazbalaryn talap etedi
QYZYLORDA. KAZINFORM — Qyzylordadaǵy ortalyq alańda qaza tapqan jasóspirimniń týystary tergep-tekserý amaldarynyń ádil júrgizilýin surap otyr.
Instagram áleýmettik jelisinde jarııalanǵan beıneúndeýden belgili bolǵandaı, qaıǵyly oqıǵa 21 qazan kúni Qyzylorda qalasynyń ortalyq alańynda bolǵan.
Jábirlenýshi tarap 13 jastaǵy jasóspirim júrek tusyna buraǵysh suǵyp alǵannan keıin qaıtys bolǵanyn alǵa tartty. Buǵan deıin de eki tarap arasynda janjal bolǵan kórinedi. Beıresmı málimetke sáıkes, olar oıynshyq kólikterdi jalǵa beretin eki kásipkerdiń qaramaǵynda jumys istegen, kelispeýshilik klıentke talastan bastalǵan.
Marqumnyń ápkesiniń aıtýynsha, qaıǵyly oqıǵadan bir apta buryn baýyry jumys berýshi áıel uryp-soqqanyn aıtyp, sol jaǵdaıǵa qatysty vıdeo áleýmettik jelide taralǵan.
— Munyń aldynda da jáı-jáı oqtalýlar, qorqytýlar boldy. «Balańdy alyp ket, bul jerde turǵyzbaımyn» degen sózder de boldy. Biz onyń bárin qoıdyq. Endi osynyń sońy osylaı ólimge ákelip otyr, — dedi ol.
Marqumnyń týystaryn kúdiktiniń 14 jasqa tolmaýy sebepti jazadan qutylyp ketýi múmkin ekeni alańdatady. Onyń ústine otbasy jasóspirimniń ólimine qatysty tergeý barysy týraly tolyq aqparat ala almaı otyrǵanyna alańdaýly.
Beınejazba avtory oqıǵa bolǵan jerdegi beınebaqylaý kameralarynyń jazbalaryna qatysty másele kóterdi.
— Eshkim úıimizge kelip, tergeý-tekserý amaldaryn júrgizgen joq. Ne bolǵany týraly eshqandaı túsinik alǵan joq. Biz ózimiz baryp tabaldyryǵyn tozdyryp júrmiz. Kameralardan eshqandaı vıdeo alynbady. Alynǵan bolsa barlyǵy turar edi, — delingen beınejazbada.
Qyzylorda oblystyq polıtsııa departamenti kámeletke tolmaǵannyń abaısyzda ólimine ákep soqqan qasaqana aýyr dene jaraqatyn keltirý deregi boıynsha qylmystyq is qozǵady.
— Kámeletke tolmaǵan kúdikti oblystyq kámeletke tolmaǵandardy beıimdeý ortalyǵyna ornalastyryldy. Sondaı-aq tergeý aıasynda kámeletke tolmaǵan adamdy tárbıeleý jónindegi mindetterdi oryndamaý deregi boıynsha qylmystyq is tirkeldi, — delingen resmı habarlamada.
Osy qaıǵyly jaǵdaıdan keıin turǵyndar ortalyq alańdaǵy oıynshyq kólikterdi jalǵa berý qyzmeti men ondaǵy tártipke qatysty alańdaýshylyq bildirip otyr.
