Qyzylordada qaıtarylǵan aktıvterge temirjoldyń arǵy betinde turatyndar úshin emhana salynady
ASTANA. KAZINFORM — Úkimet Arnaýly memlekettik qordan Qyzylorda qalasynda jańa emhanany salýǵa jáne ony tehnıkalyq jabdyqtaýǵa 6,5 mlrd teńge bóldi.
Úkimettiń baspasóz qyzmetiniń habarlaýynsha, medıtsınalyq nysan qalanyń temirjoldyń arǵy betindegi turǵyndary úshin salynyp jatyr.
Qazirgi jumys istep turǵan emhana 1966 jyly salynǵan, tozý deńgeıi joǵary ǵımaratta ornalasqan. Jańa medıtsınalyq mekeme paıdalanýǵa berilgennen keıin bir aýysymda 400-ge deıin naýqasty qabyldaı alady jáne aýdannyń 35 myńnan astam turǵynyn medıtsınalyq qyzmetpen qamtamasyz etedi.
— Emhana qurylymy ambýlatorııalyq kómektiń negizgi baǵyttaryn: balalar men eresekterdi qabyldaý, jalpy dárigerlik praktıka, áıelder konsýltatsııasy, kúndizgi statsıonar jáne súzgi-bokstaryn qamtıdy. Dıagnostıkalyq jáne ońaltý bloktary fýnktsıonaldyq dıagnostıka, medıtsınalyq ońaltý, stomatologııa kabınetterin, sondaı-aq zerthana men zararsyzdandyrý bólimshesin biriktiredi, — delingen habarlamada.
Emhana zamanaýı medıtsınalyq tehnıkamen jabdyqtalady. Atap aıtqanda, kompıýterlik tomograf, zamanaýı ýltradybystyq apparattar, rentgen apparattary jáne taǵy basqa da jabdyqtar ornatylady.
Qazirgi ýaqytta qurylys alańynda shatyr plıtalaryn betondaý jáne birinshi qabattyń ishki bólý qabyrǵalarynyń kirpishterin qalaý jumystary bastaldy. Jobany jyl sońyna deıin aıaqtaý josparlanyp otyr.
Aıta keteıik, 2024-2026 jyldary Arnaýly memlekettik qordan 500-den astam áleýmettik mańyzdy jobany júzege asyrýǵa jalpy somasy 610 mlrd teńge qarajat bólindi. Onyń ishinde «densaýlyq saqtaý júıesin damytý» baǵyty boıynsha jalpy quny 170 mlrd teńgeden asatyn 191 joba qarjylandyryldy.
Eske salaıyq, buǵan deıin qaıtarylǵan aktıvterdiń arqasynda Almatynyń 2500-den astam turǵyny aýyzsýǵa qol jetkizgenin habarlaǵanbyz.
