Qyzylordada qaıta jańǵyrtylǵan Jańaqorǵan temirjol vokzaly ashyldy
QYZYLORDA. KAZINFORM - Búgin oblys ákimi Murat Ergeshbaev, Syr óńirine jumys saparymen kelgen QR Kólik vıtse-mınıstri Jánibek Taıjanov, oblystyq máslıhat tóraǵasy Murat Tleýmbetov, Qorqyt ata atyndaǵy Qyzylorda ýnıversıtetiniń Basqarma tóraǵasy-rektor Naýryzbaı Baıqadamov, zııaly qaýym ókilderi men el aǵalary qaıta jańǵyrtýdan ótken Jańaqorǵan temirjol vokzalynyń ashylý rásimine qatysty.
Eske salsaq, Memleket basshysynyń tapsyrmasymen elimizdegi 124 vokzal jańǵyrtylyp jatyr. Byltyr sol kezdegi oblys ákimi Nurlybek Mashbekuly jańǵyrtýdan ótetin vokzaldar tizimine barlyq aýdan ortalyqtaryndaǵy jáne Tóretam, Sekseýil stantsııalaryndaǵy ǵımarattardy, Jańaqorǵan aýdanyndaǵy Talap beketiniń platformasyn engizgen bolatyn.
Barlyq vokzaldaǵy jańǵyrtý jumystaryna 10 mlrd. teńgege jýyq qarjyny bólindi.
Rásimde Murat Nálqojauly temirjol vokzaldary jolaýshylarǵa qolaıly jáne qaýipsiz, óńirdiń zamanaýı kelbetin aıshyqtaıtyn nysandarǵa aınalatynyn atap ótti.
- Oblys aýmaǵy - toǵyz joldyń torabynda ornalasqan, óńirler men elderdi baılanystyratyn mańyzdy kólik dálizi. Búginde aımaǵymyzdan halyqaralyq jáne óńiraralyq temirjol baǵyttarymen myńdaǵan jolaýshy, sheteldik týrıster qatynaıdy. Sondyqtan temirjol vokzaldaryn zaman talabyna saı jańǵyrtý turǵyndar úshin de, qonaqtar úshin de erekshe mańyzǵa ıe. Búgin biz Jańaqorǵan kentinde 1 mlrd.teńgeden astam qarjyǵa qaıta jańǵyrtylǵan, aýmaǵy 8 838 sharshy metr bolatyn temirjol vokzalyn el ıgiligine tabystaǵaly turmyz. Vokzal kúnine 121 jolaýshyny ótkizýge qaýqarly. Ǵımarattyń qasbeti men irgetasy qaptaldy, tóbe jabyndysy men esik-terezesi aýystyryldy. Elektr jelileri montajdalyp, jylý júıesi júrgizildi, perron abatandyryldy. Nysan zamanaýı talaptarǵa saı, joǵary sapaly jabdyqtarmen jaraqtalǵan. Budan bólek, búgin Shıeli, erteń Qazaly temirjol vokzaldaryn tabystaımyz. Oblys aýmaǵynan ótetin árbir qonaq pen týrıst mundaǵy qyzmet sapasy men jaılylyqqa oń baǵasyn beredi dep senemiz, - dedi Murat Nálqojauly.
Jıynda Jánibek Taıjanov pen eńbek ardageri Sáýlebek Qalybaev sóz sóılep, temirjol salasy qyzmetkerleri men merdiger mekeme ókilderi oblys ákiminiń Alǵys hatymen marapattaldy.
Búginde oblys aýmaǵynan 15 jolaýshy poıyzy ótedi, oblys ortalyǵynan Astana, Petropavl, Pavlodar, Kókshetaý, Semeı, Túrkistan qalalaryna 6 jolaýshylar poıyzy júredi. Óńirde 80 shaqyrymnan astam temirjol kúrdeli jóndelip jatyr.
El aýmaǵyndaǵy temirjol vokzaldaryn qaıta jańǵyrtý týraly Prezıdent tapsyrmasyna sáıkes 2024 jyly Qyzylorda temirjol vokzaly kúrdeli jóndeýden ótip, abattandyryldy. Budan bólek, aımaqtaǵy 7 vokzal, Tereńózek jáne Jalaǵashtaǵy 2 qyzmet kórsetý pýnkti kúrdeli jóndelip jatyr. Talap beketinde 322 mln teńgege 1 188 sharshy metrlik jolaýshylar platformasyn jańǵyrtý jumystary aıaqtaldy.
