Qyzylordada qatty jelden ushqan úı shatyrlaryn merdigerler qalpyna keltiredi
QYZYLORDA. KAZINFORM – Qyzylorda qalasynda 28 maýsym kúngi daýyldyń saldaryn joıý jumysy jalǵasyp jatyr. Bul týraly qala ákimdigi habarlady.
Jeksenbi ekenine qaramastan kommýnaldyq qyzmet, elektr jelisi mekemeleriniń, tótenshe jaǵdaılar salasy men merdiger uıymdardyń qyzmetkerleri kúsheıtilgen rejımde jumys istep, apat saldaryn jedel joıýǵa kúsh biriktirdi.
- Keshe kúnniń kúrt buzylýynan, ıaǵnı qatty soqqan jeldiń saldarynan Qyzylorda qalasynda oqys oqıǵalar bolǵan edi. Qalanyń jekelegen aýmaqtarynda taldardyń qulaýynan elektr jelileri men baǵanalaryna zaqym keldi. Tasbóget kentinde eki, Astana shaǵyn aýdanynda bir turǵyn úıdiń shatyry ushyp ketti. Jaǵdaıdy qalpyna keltirý úshin kommýnaldyq mekemelerdi shuǵyl jumyldyrdyq. 20-dan astam brıgada qurylyp, jumys istedi. Nátıjesinde elektr jelileri qalpyna keltirildi, turǵyndarǵa elektr energııasy úzilissiz berildi. Shatyrlar, aıaldama qulaǵan aýmaqtar tolyq tazartyldy. Merdiger mekemeler kepildik merzimine baılanysty shatyrlardy jóndeý jumysyn júrgizip jatyr jáne bul qysqa merzimde aıaqtalady, - dedi Qyzylorda qalasy ákiminiń orynbasary Arnur Nurmaǵanbetov.
Eske salsaq, Qyzylorda qalasynda bolǵan qatty daýyldyń saldarynan qulaǵan aǵashtar men elektr baǵanalary tolyqtaı qalpyna keltirilip, elektr energııasy qaıta berildi.
