Qyzylordada kásiporynnyń nemquraılyǵynan merdiger 80 mln teńgeni ıemdenip ketken
QYZYLORDA. KAZINFORM — Qyzylorda kólik prokýratýrasy «Infrakos» sharýashylyq júrgizý quqyǵyndaǵy respýblıkalyq memlekettik kásipornynyń memlekettik satyp alý kezinde bólingen memlekettik qarajatqa nemquraıly qaraǵanyn anyqtady.
«KazakhinTrade» JShS RMK-dan montajdalǵan jerústi kabel jelisin bólshekteý kezinde paıda bolatyn kabel óniminiń qaldyǵy — qorǵasyn qabyǵyn satyp alǵan.
Alaıda satyp alýshy satýshynyń shotyna shart boıynsha belgilengen merzimde tolyq tólem jasamaǵan.
Al RMK óz tarapynan zańmen kózdelgen tártippen tólenbegen qarajatty óndirýge baǵyttalǵan sharalardy qabyldamaǵan. Osymen shektelmeı josyqsyz satyp alýshymen qosymsha shartqa otyryp, oǵan quqyqqa qaıshy artyqshylyq bildirgen.
Atalǵan kelisimshart prokýratýramen ýákiletti memlekettik organǵa qadaǵalaý aktisi engizilgennen keıin birjaqty buzyldy.
Sot sheshimimen «KazakhinTrade» JShS-nen 80 mln teńgege jýyq ósimpul somasy tolyǵymen óndirildi.
RMK basshysy jeke jáne zańdy tulǵalarǵa sheshim daıyndaý jáne qabyldaý kezinde zańda kózdelmegen artyqshylyq kórsetkeni úshin «qyzmetine tolyq sáıkes emestigi týraly eskertý» túrindegi tártiptik jaýapqa tartyldy (memlekettik qyzmetke kir keltiretin tártiptik teris qylyq úshin), 7 qyzmetkerke «sógis» jarııalandy.
