Qyzylordada kásipkerlik salasyndaǵy zańbuzýshylyqtar sany 42%-ǵa artqan
QYZYLORDA. KAZINFORM — Bıyl 8 aıda Qyzylorda oblysyndaǵy kásipkerlik sýbektilerin tekserý nátıjesinde 732 zańbuzýshylyq anyqtaldy.
Baqylaý jáne qadaǵalaý organdarynyń bıznes-qoǵamdastyqqa esep berý jıynynda málim bolǵandaı, bul ótken jyldyń osy kezeńimen salystyrǵanda 42%-ǵa joǵary.
Zańbuzýshylyqtardyń basym bóligi sanıtarııalyq-epıdemıologııalyq talaptardyń saqtalýy, eńbek zańnamasy men jumysshylardyń quqyǵyn qorǵaý, salyqtyq ákimshilendirý jáne jer qatynastary salalaryna tıesili.
— Bıyl memlekettik organdar tarapynan bıznes sýbektilerine 34 negizsiz tekserý júrgizilgen. Mundaı jaǵdaılarǵa jol berilmeýi tıis. Baqylaý-qadaǵalaý organdary bızneske qatysty tekserý sharalaryn taǵaıyndaý kezinde zańnama talaptarynyń qatań saqtalýyn qamtamasyz etýi qajet, — dedi oblys ákiminiń orynbasary Nurıddın Amanqul.
Eske salaıyq, jýyrda Baıqońyr qalasynyń prokýratýrasy Qarmaqshy aýdandyq sanıtarııalyq-epıdemıologııalyq baqylaý basqarmasy tarapynan kásipkerlik qyzmetke zańsyz aralasý faktisin anyqtady.
