Qyzylordada kásipkerlik nysandaryn negizsiz tekserý tyıylmaı tur
QYZYLORDA. KAZINFORM – Jyl basynan beri Qyzylorda oblystyq kásipkerler palatasyna kásipkerlerden bıznesti qorǵaý baǵytynda 321 ótinish tústi.
Sonyń 36%-y oń sheshimin taýyp, kásipkerlerdiń 1,4 mlrd teńge kólemindegi múliktik quqyqtary qorǵaldy. Aryz-shaǵymdardyń basym bóligi memlekettik satyp alý, qurylys, sáýlet jáne aýyl sharýashylyǵy salalaryn qamtydy.
- Sarapshylarymyz osy kezge deıin 14 sot protsesine qatysty. Onyń 12-sinde sot kásipkerlerdiń paıdasyna sheshim shyǵardy. Sondaı-aq olar 93 mln teńge qarajatyn saqtap qaldy. Ótinishterge taldaý jasaý kezinde belgili bolǵany, 49 aryz boıynsha memlekettik organdar ruqsat berýdi rásimdeý barysynda zańnamada qaralmaǵan qosymsha qujattardy talap etken. 47-sinde kásipkerlerdiń aryzyna salǵyrt qaraǵan. Ótinishterdiń 40%-y kásippen aınalysatyn azamattardyń zań talaptaryn tolyq bilmeıtinin kórsetti, - dedi palata dırektory Pirmuhammed Syzdyq.
Jyl basynan beri kásipkerlik nysandaryna 1 344 tekserý júrgizilse, sonyń teń jartysynan astamy – negizsiz tekserýler.
Buǵan deıin Qarjy vıtse-mınıstri Erjan Birjanov JJ Studio efırinde bızneske salyqtyq tekserýler, ósimpul men aıyppuldar boıynsha jeńildikter qarastyrylatynyn aıtqan edi.