Qyzylordada kásipkerlerge zańsyz aıyppul salǵandar jaýapqa tartyldy
ASTANA. KAZINFORM — Qyzylorda oblysynda ınvestorlardyń quqyqtaryn buzý derekteri anyqtalyp, sheneýnikterdiń zańsyz áreketteri áshkerelendi. Prokýratýra tekserisi barysynda kásipkerlerdi negizsiz ákimshilik jaýapkershilikke tartý faktileri belgili bolyp, salynǵan aıyppuldar joıylyp, kináli tulǵalar jaýapqa tartyldy.
— Aral aýdanynda Memlekettik kirister basqarmasy prokýrordyń mindetti kelisiminsiz ınvestordy ÁQBtK-niń 279-babymen ákimshilik jaýaptylyqqa tartqan. Osyǵan uqsas buzýshylyqtar Jańaqorǵan aýdanynda da tirkelip, ınvestorǵa qatysty bes ákimshilik is boıynsha aıyppul zańsyz salynǵan, — dep habarlady prokýratýradan.
Prokýratýranyń narazylyǵy negizinde barlyq zańsyz sheshimderdiń kúshi joıyldy. Zań buzýshylyqtarǵa jol bergen laýazymdy tulǵalarǵa qatysty ákimshilik ister qozǵaldy.
Kásipkerlik qyzmetke zańsyz aralasqany úshin olar ÁQBtK-niń 173-baby boıynsha ákimshilik jaýaptylyqqa tartyldy. Bul rette mundaı áreketter úshin 100 AEK mólsherinde aıyppul túrindegi ákimshilik jaýaptylyq kózdelgenin aıta ketý kerek.
Aıta keteıik, buǵan deıin Bas prokýratýranyń Investorlardyń quqyqtaryn qorǵaý komıteti Aqmola oblysynda ekotýrızm salasynda halyqaralyq jobany iske asyryp jatqan kompanııadan 16 myń gektar jerdi zańsyz tartyp almaq bolǵan áreketke tosqaýyl qoıǵanyn jazdyq.
