Qyzylordada kásipkerlerge 70 mln teńge shyǵyn keltirgen 2 adam sottaldy

ASTANA. KAZINFORM - Qyzylorda oblysynda altyn buıymdaryn satatyn kásipkerlerge jalǵan aıtý arqyly 70 mln teńge kóleminde shyǵyn keltirgen eki adamǵa qatysty sot úkimi shyqty. 

Shıeli aýdandyq sotynda QR Qylmystyq kodeksiniń 190-babynyń 4-bóliginiń 2) tarmaǵymen eki sottalýshyǵa qatysty qylmystyq is qaraldy. 

«Sottalýshylar 2022 jyldyń naýryz aıynda paıdakúnemdik maqsatta bótenniń múlkin iri jáne asa iri mólsherde birneshe ret jymqyrý maqsatynda aldyn ala ýádege kelgen. Sottalýshylar sol jyldyń 2-26 tamyz aralyǵynda aýdandaǵy altyn buıymdaryn satatyn kásipkerlerge jalǵan aıtý arqyly senimine kirgen. Olardan altyn buıymdaryn alyp, naryqtyq qunynan tómen baǵamen lombardtarǵa ótkizip otyrǵan», - dep atap ótti Shıeli aýdandyq sotynan. 

Túsken aqshany olar jeke bas paıdasyna jaratyp jibergen. Osylaısha jábirlenýshilerge jalpy quny 70 089 970 teńge kóleminde múliktik shyǵyn keltirgen. 

«Sot úkimimen sottalýshylardyń árqaısysyna 5 jyl 6 aı merzimge bas bostandyǵynan aıyrý jazasy taǵaıyndaldy. Jábirlenýshilerge keltirilgen shyǵynnyń 10 000 000 teńgesi qaıtarylǵan. Talap qoıýshylardyń azamattyq talaptary ishinara qanaǵattandyryldy. Olardyń paıdasyna ókildiń kómegine jumsaǵan shyǵyndaryn qosqanda jalpy mólsheri 60 527 690 teńge óndirý týraly sheshim shyǵaryldy», - dep tolyqtyrdy aýdandyq sottan.

Eske salsaq, budan buryn Qyzylorda oblysynda egiz balany satý oqıǵasyna qatysty úsh adam sottaldy.