Qyzylordada kásipkerler men turǵyndardan aqsha bopsalaǵan top ustaldy
QYZYLORDA. KAZINFORM – Qyzylorda oblystyq Polıtsııa departamenti uıymdasqan qylmysqa qarsy kúres basqarmasynyń qyzmetkerleri oblystyq prokýratýrasynyń úılestirýimen uıymdasqan qylmystyq topty quryqtady.
Jedel izdestirý barysynda top músheleriniń kásipkerler men azamattardan «kúsh qoldanamyn» dep qorqytý arqyly aqsha bopsalap, túzeý mekemelerindegi sottalǵandarǵa arnalǵan «ortaq qorǵa» qarjy jınaýmen aınalysqany anyqtaldy.
- Tergeý barysynda qylmystyq áreketterdiń birneshe epızody dáleldenip, sanktsııalanǵan tintý júrgizildi. Nátıjesinde travmatıkalyq jáne pnevmatıkalyq qarýlar, oq-dáriler, aqsha qarajaty jáne ózge de aıǵaq zattar tárkilendi. Sonymen qatar jábirlenýshiler men kýálardan jaýap alynyp, bank aýdarymdary men tsıfrlyq dáleldemeler zerttelip, qylmystyq toptyń zańsyz áreketteri tolyq rastaldy. Atalǵan derekter boıynsha qorqytyp alý, zańsyz qarý saqtaý, buzaqylyq jáne uıymdasqan qylmystyq top qurý men oǵan qatysý faktileri boıynsha birneshe qylmystyq is tirkeldi. Qylmystyq toptyń 8 múshesi kúdikti retinde tanylyp, sot sanktsııasymen kúzetpen ustaý túrindegi bultartpaý sharasy qoldanyldy, - delingen polıtsııa habarlamasynda.
Sotqa deıingi tergep-tekserý aıaqtalyp, qylmystyq is sotqa joldandy. Sot úkimimen uıymdasqan qylmystyq toptyń jetekshisi men belsendi múshelerine 4 jyldan bastap 11 jylǵa deıin merzimge bas bostandyǵynan aıyrý jazasy taǵaıyndalyp, úkim zańdy kúshine endi.
Eske salaıyq, budan buryn Qyzylorda oblysynda «Torǵaı Petroleým» AQ-nyń 416,6 mln teńgesin asa iri mólsherde jymqyrý isi boıynsha sot úkimi shyqty.
