Qyzylordada kásipkerdiń qyzmetine zańsyz aralasqan SES basshysy jazalandy
QYZYLORDA. KAZINFORM – Baıqońyr qalasynyń prokýratýrasy Qarmaqshy aýdandyq sanıtarııalyq-epıdemıologııalyq baqylaý basqarmasy tarapynan kásipkerlik qyzmetke zańsyz aralasý faktisin anyqtady.
Basqarma ókilderi Tóretam kentinde ornalasqan azyq-túlik dúkeninen baqylaý maqsatynda 38 ónim satyp alǵan. Alaıda onyń arasynda satyp alý josparynda kózdelmegen taýarlar bolǵan.
- Mysaly, maılylyǵy 2,5% «Petropavlovskoe» ýltrapasterlengen sút ónimine qatysty jedel den qoıý sharasyn qoldaný týraly qaýlylar shyǵaryp, taýardy satylymnan alyp tastaýdy talap etken. Nátıjesinde jeke kásipkerdiń ónimdi satylymnan alyp tastaýǵa, ıaǵnı tyıym salynbaǵan taýardy satýdan túsetin paıdany ala almaýyna ákep soqtyrǵan. Qadaǵalaý aktisi boıynsha jospardan tys satyp alynǵan ónimder satyp alý aktisinen alynyp, jedel den qoıý sharasyn qoldaný týraly qaýlylardyń kúshi joıyldy, - delingen oblystyq prokýratýra habarlamasynda.
Kásipkerlik qyzmetke zańsyz aralasqany úshin aýdandyq basqarma basshysy men bas mamany Ákimshilik quqyqbuzýshylyq týraly kodekstiń 173-babynyń 1-bóligi boıynsha ákimshilik jaýaptylyqqa tartylyp, 432 500 teńge aıyppul salyndy.
Buǵan deıin biz Abaı oblysynyń prokýratýrasy 3,4 myń kásipkerdiń quqyǵyn qorǵaǵanyn jazdyq.
