Qyzylordada qarjyny josparsyz jumsaǵan sport mekemesiniń basshylaryna qatań sógis berildi
QYZYLORDA. KAZINFORM — Qyzylorda oblystyq dene shynyqtyrý, sport jáne týrızm basqarmasynyń basshysy Baqtııar Artaevtyń tóraǵalyǵymen sport mekemeleriniń basshylary qatysqan jıyn ótti. Onda 2025 jyldyń alǵashqy jartyjyldyq qorytyndysy talqylandy.
Basqarmanyń baspasóz qyzmeti habarlaǵandaı, tekserý barysynda 10-nan astam mekemeniń bir jylǵa bólingen qarjynyń 75%-dan kóbin josparsyz jumsaǵany anyqtaldy.
Memleket qarjysyn tıimdi ıgere almaǵan mektep dırektorlaryna basqarma basshysy qatań sógis berip, osy ýaqytqa deıin bıýdjet qarajatyn ıgerýde osaldyq tanytqandardyń jumysy qatań baqylaýda bolatynyn jetkizdi.
Tekserý barysynda memleketten bólingen qarjy maqsatsyz paıdalanǵany dáleldense, mekeme basshysyna, bas esepshisine jáne sol sport túri boıynsha bapkerge sheshim qabyldanatynyn jetkizdi.
— Barlyq mekeme basshylaryna bıýdjet qarajatyn ornymen, tıimdi ıgerýdi tapsyramyn. Bul kezge deıinde sizderge qarjynyń 70%-yn olımpıadalyq, 30%-yn ulttyq sportqa jáne olımpıadalyq emes sport túrlerine baǵyttaýdy tapsyrǵan bolatynmyn. Qarjyny sport túrlerine baǵyttaý kezinde olımpıadalyq sport túrlerine basymdyq berýdi mindetteımin. Sizderdiń nátıjelerińiz osy olımpıadalyq sport túrlerinen kórsetken kórsetkishterińizge baılanysty esepteledi, — dedi Baqtııar Artaev.
Sondaı-aq basqarma basshysy ǵımarattarǵa jóndeý jumysyn merziminde júrgizbegen dırektorlardy synǵa alyp, olarǵa da qatań sógis berdi. Eki apta kóleminde demeýshiler esebinen jumys qarqynyn arttyryp, ǵımarattardy jańa oqý jylyna daıyndaýdy tapsyrdy.
— Barlyq mekeme basshylary ózderine qarasty sport nysandarynyń syrtqy-ishki kelbetin udaıy kútip ustaýdy, búlingen aýmaqty der kezinde retteýdi, sport nysandarynyń syrtqy aýmaǵyn nazarda ustaýdy qaperden shyǵarmaýy kerek, — dedi ol.
Buǵan deıin biz Qyzylorda oblysynyń Jańaqorǵan aýdanynda mekteptiń bas esepshisi bolǵan Abzal Seıdekovtiń qyzmet babyn paıdalanyp, memlekettik mekeme qarjysyn qaltaǵa basqanyn jazǵan bolatynbyz.