Qyzylordada qarjy pıramıdasyn basqarǵan azamat 5 jylǵa sottaldy
ASTANA. KAZINFORM — Qyzylorda qalasynda «WornerBros» qarjy pıramıdasynyń qurylymdyq bólimshesin basqarǵan tulǵaǵa qatysty sot úkimi shyqty. Tergep-tekserýdi QMA Qyzylorda oblysy boıynsha departamenti júrgizdi.
Uıymdastyrýshy azamattardy «WornerBros» platformasy arqyly qysqa beınerolıkter men fılmderdi kórgeni úshin tabys tabýǵa bolady degen jeleýmen qarjy pıramıdasyna tartqan. Qatysýshylarǵa referaldyq silteme arqyly tirkelip, quny 10 myń teńgeden 11 mln teńgege deıingi VIP-paketterdiń birin satyp alý usynylǵan. Bul rette kúnine 735 myń teńgege deıin tabys túsetini ýáde etilgen.
— Árbir jańa qatysýshy úshin bonýs tólenip otyrǵan, bul azamattardy júıege turaqty túrde tartýǵa yntalandyrǵan. Shemany nasıhattaý úshin WhatsApp toptary, áleýmettik jelilerdegi jarnamalar jáne úgit-nasıhat kezdesýleri paıdalanylǵan, — dep habarlady QMA.
Tergeý barysynda salymshylardyń qarajatyn jınaqtaý jáne aýdarý úshin qoldanylǵan krıptoámııandar anyqtaldy. Sot sanktsııasymen 3 mln USDT kólemindegi krıptoaktıvterge tyıym salyndy. Sot aıyptalýshyny kináli dep tanyp, 5 jylǵa bas bostandyǵynan aıyrý jazasyn taǵaıyndady. Sondaı-aq 24 jábirlenýshiniń azamattyq talap-aryzdary qanaǵattandyryldy.
Úkim zańdy kúshine endi.
Buǵan deıin Jambyl oblysynda Envida ai qarjy pıramıdasyna qatysty tergeý bastalǵanyn jazǵan edik.
