Qyzylordada qarjy pıramıdalarynan kelgen zalal 59 mln teńgeden asty
QYZYLORDA. KAZINFORM – Qyzylorda oblysy boıynsha ekonomıkalyq tergep-tekserý departamenti qarjy pıramıdalaryn anyqtap, olardyń zańsyz qyzmetin toqtatý, uıymdastyrýshylardy qylmystyq jaýapkershilikke tartý baǵytynda atqarylǵan jumysy týraly málimdedi.
Qarjy pıramıdalary – azamattardyń senimine kirip, olardy joǵary tabysqa keneltetinine sendirip, aqshasyn zańsyz ıemdenýge baǵyttalǵan qylmystyq shema. Mundaı uıymdardyń naqty ekonomıkalyq qyzmeti bolmaıdy. Salymshylarǵa tólenetin qarajat jańa qatysýshylardyń esebinen qalyptasady. Sonyń saldarynan belgili bir kezeńnen keıin mundaı júıe kúırep, myńdaǵan adam qarajatynan aıyrylyp jatady.
- Jyl basynan beri 5 qarjylyq pıramıdanyń joly kesilip, tergep-tekserý barysynda jábirlenýshilerge keltirilgen zalal somasy 59 mln teńgeden asty. Sottyń zańdy kúshine engen úkimderi negizinde memleket kirisine quny 5 mln 600 myń teńgeden astam avtokólik, 3 mln-ǵa jýyq USDT krıptoaktıvter tárkilendi, - dedi departament basshysynyń orynbasary Rýslan Satybaldıev.
Qylmystyq kodekstiń 217-babyna sáıkes qarjylyq nemese ınvestıtsııalyq pıramıda quryp, oǵan basshylyq etken kinálilerge 5 jyldan 12 jylǵa deıin bas bostandyǵynan aıyrý jazasy kózdelgen. Departament ókili el zańnamasynda qarjy pıramıdalaryn jarnamalaǵandarǵa qatysty da qylmystyq jaýapkershilik kózdelgenin eskertti. Sondyqtan blogerler men qoǵamdyq pikir kóshbasshylaryna, jarnama agenttikterine qandaı da bir jobany jarnamalamaı turyp onyń zańdylyǵyn muqııat tekserýge keńes berdi.
- Áleýmettik jeliler men ınternet-resýrstardaǵy qarjy pıramıdalaryn nasıhattaıtyn zańsyz kontentti anyqtaý baǵytynda monıtorıng júrgizilip turady. Osy kúnge deıin qarjy pıramıdasynyń belgisi bar 3500-den astam saıt buǵattaldy, - dedi Rýslan Satybaldıev.
Jýyrda Qyzylorda oblysynda «Fari Invest» qarjy pıramıdasyna qatysty qylmystyq is boıynsha sot úkimi shyqty.
