Qyzylordada kartop ónimi boıynsha tapshylyq joq

QYZYLORDA. KAZINFORM - Qyzylorda oblysynda kartop baǵasynyń ósýi baıqalyp otyr. Keıbir saýda dúkenderinde onyń baǵasy 400 teńgege deıin jetti.

Oblysta bazardaǵy baǵa 380 teńgege jetse, «Magným», «Anvar» sýpermarketterinde ol 400 teńgeni qurady.

Sýpermarket ókilderiniń aıtýynsha, fılıal bolǵandyqtan ortalyq ofısten jol shyǵynymen jetkiziledi. 

Oblystyq aýyl sharýashylyńy jáne jer qatynastary basqarmasynyń habarlaýynsha, ákimdik tarapynan oblysta áleýmettik mańyzy bar azyq-túlik taýarlarynyń turaqtandyrý qory qalyptastyrylǵan. Ónimniń qory saqtalýda.

Qazir turaqtandyrý qorynda jalpy kólemi 1 000 tonnaǵa jýyq kartop ónimi bar. Bul ónimder qalanyń barlyq bóliginde ornalasqan 35 áleýmettik dúken jelisinde 143 teńgeden erkin túrde eshqandaı shekteýsiz bosatylyp jatyr.

Sondaı-aq turaqtandyrý qory arqyly ózara áriptestik negizde jumys isteıtin 9 iri saýda úıi men úı mańyndaǵy 16 dúken arqyly tıisti saýda ústemesimen 158 teńgeden bosatylýda. 

- Bıyl jergilikti óndirýshilerden forvardtyq negizde jáne ózge de óńirlerdiń óndirýshilerden 4 018 tonna kartop satyp alý jóninde kelisimshart jasalǵan. Atalǵan ónimder qajettiligine qaraı turaqtandyrý qorynyń qoımasyna jetkizilýde. Saýda oryndarynda negizsiz qymbattaý, tapshylyqty boldyrmaý úshin tıisti organdarmen qajetti sharalar qabyldanǵan, - dep málim etti basqarmadan.

Eske salsaq, budan buryn Túrkistanda kartop 100 teńgeden satylyp jatyr.