Qyzylordada qaraýsyz temirjol ótkelinde júk kóligi poıyzben soqtyǵysty

QYZYLORDA. KAZINFORM – Keshe, 5 qarasha kúni keshke Qyzylorda oblysy Shıeli aýdanynyń Tartoǵaı stansasyndaǵy temirjol ótkelinde jol-kólik oqıǵasy tirkeldi.

Qyzylorda oblystyq Polıtsııa departamentiniń baspasóz qyzmeti bul oqıǵaǵa baılanysty abaısyzda adam ólimine ákep soqqan jol júrisi nemese kólik quralyn paıdalaný qaǵıdalaryn buzý deregi boıynsha qylmystyq is qozǵalǵanyn málimdedi.

- Aldyn ala málimet boıynsha «Kamaz» avtokóliginiń júrgizýshisi qozǵalystyń qaýipsizdigine kóz jetkizbeı, jol qozǵalysy erejelerin buzyp, Tartoǵaı stansasyndaǵy qaraýsyz temirjol ótkelinde Mańǵystaý-Almaty baǵytyndaǵy jolaýshylar poıyzymen soqtyǵysty. Sonyń saldarynan avtokólik júrgizýshisi medıtsınalyq mekemede kóz jumdy. Qazirgi ýaqytta jol-kólik oqıǵasynyń mán-jaıyn anyqtaý úshin qajetti tergeý áreketteri júrgizilip jatyr, - delingen habarlamada.

«Qazaqstan temir joly» UK» AQ baspasóz qyzmeti oqıǵa 5 qarasha kúni saǵat 16.21-de Qyzylorda-Shıeli ýchaskesiniń rettelmeıtin Baqtysaı-Tartoǵaı temirjol ótkelinde bolǵanyn atap ótti.

- Jolaýshylar men lokomotıv brıgadasy zardap shekken joq. Jol-kólik oqıǵasy faktisi boıynsha tekserý júrgizilip jatyr, - delingen habarlamada.

Qyzylorda jol dıstantsııasynyń bastyǵy Marat Ońalov temirjol ótkelinde jol belgileri ornatylǵanyn, qurylǵylar rejım boıynsha jumys istep turǵanyn aıtty.

- Jalpy, ótkeldiń jaǵdaıy talapqa saı keledi. Qazir oqıǵanyń sebep-saldary anyqtalyp jatyr, - dedi ol.

«Qazaqstan temir joly» jol ótkelderinde qozǵalys erejelerin saqtaý jaýapkershiligi avtokólik júrgizýshilerine júkteletinin eske saldy. Kompanııa júrgizýshilerdi jol qozǵalysy erejelerin saqtaýǵa, jabyq nemese jypylyqtaǵan sıgnalda jolǵa shyqpaýǵa, poıyzdyń tejeý joly myńdaǵan metrdi quraıtynyn jáne shuǵyl toqtaý múmkin emestigin eskerýge shaqyrdy.

Buǵan deıin Jambyl oblysyndaǵy Taraz – Shý baǵytynda jolaýshylar poıyzy avtobýspen soqtyǵysa jazdaǵanyn jazǵan edik.