Astanada birqatar tulǵaǵa Qazaqstannyń Qurmetti azamaty belgisi tabystaldy

ASTANA. KAZINFORM - Astana qalasynda birqatar kórnekti tulǵalar «Qazaqstannyń Qurmetti Azamaty» belgisimen marapattaldy.

Atalǵan rásim Bilim órkenıeti ulttyq ınnovatsııalyq ǵylymı-zertteý ortalyǵynyń (Bilim Orkenieti) uıymdastyrýymen ótti. 

«Qazaqstannyń Qurmetti azamaty» belgisin taǵaıyndaý – muqııat ári kópsatyly irikteýden turatyn protsess. Úmitkerlerdi kásibı ujymdar, qoǵamdyq uıymdar nemese áriptesteri usynady. Usynylǵan tulǵalarǵa qatysty olardyń qoǵamǵa qosqan úlesi, uzaq jyldar boıǵy eńbegi, naqty nátıjeleri – ekonomıkalyq ósimge, bilim berý salasyna nemese áleýmettik bastamalarǵa qosqan áseri jan-jaqty negizdelgen qujattar arqyly dáleldenedi.

Kelesi kezeńde Bilim Orkenieti janyndaǵy arnaıy komıssııa kandıdattardy baǵalaıdy. Baǵalaý barysynda uzaq merzimdi yqpal, ınnovatsııalyq kózqaras, etıkalyq ustanym jáne ulttyq basymdyqtarǵa sáıkestik sekildi krıterııler eskeriledi. Qajet bolǵan jaǵdaıda sarapshylar pikiri tyńdalyp, qosymsha tekserýler júrgiziledi. Komıssııa maquldaǵan úmitkerlerge marapat resmı saltanatty jaǵdaıda tabystalady.

Rásimde marapatty Bilim Orkenieti ókilderi, sonyń ishinde Áziret Satylǵanuly tabys etti. Ádette bul belgi jylyna 5-10 adamǵa ǵana beriledi. Mundaı shekteý marapattyń bedelin saqtaýǵa jáne onyń aıryqsha mánin arttyrýǵa múmkindik beredi. Marapat 1993 jylǵy «Memlekettik marapattar týraly» zań qaǵıdattaryna sáıkes ulttyq qundylyqtardy ilgeriletýge baǵyttalǵan.

Bul belgi ekonomıka, mádenıet, bilim berý nemese áleýmettik salada eleýli úles qosqan, uzaq jyldar boıy adal eńbek etken, jańashyl bastamalarymen qoǵamǵa naqty paıda tıgizgen azamattarǵa beriledi. Mundaı moıyndaý qoǵamdaǵy jaýapkershilikti arttyryp, ulttyq birlikti kúsheıtýge yqpal etedi.

Bıyl bes azamat «Qazaqstannyń Qurmetti azamaty» belgisimen marapattaldy. Olardyń árqaısysy óz salasynda Qazaqstannyń damýyna aıtarlyqtaı úles qosqan.

Raıs Agaev – kásipker, «FAVORIT» kompanııasynyń negizin qalaýshy. Ol bıznesti damytýǵa, kásibı kadr daıarlaýǵa jáne korporatıvtik áleýmettik jaýapkershilikti ilgeriletýge qosqan úlesi úshin marapattaldy. Kompanııasy avtokólik naryǵynda ınnovatsııalyq sheshimder engizip, jyldyq aınalymy 3 mln dollarǵa jetip, 180 adamdy jumyspen qamtydy. Sonymen qatar jas mamandarǵa taǵylymdamalar uıymdastyryp, jańa tehnologııalar boıynsha oqytý júrgizdi.

Orazaly Sabden – ekonomıst, Ulttyq quryltaı múshesi. Ol ekonomıkalyq saıasat pen damý strategııalaryn qalyptastyrýdaǵy jańashyl kózqarasy úshin marapattaldy. Onyń eńbekteri eldiń qarjylyq-ekonomıkalyq júıesine yqpal etti.

Qanatbek Kúńgójınuly – tsırk dırektory, mádenıet qaıratkeri. Ulttyq mádenıetti saqtaý jáne damytý jolyndaǵy qyzmeti, sondaı-aq halyqaralyq deńgeıde tanylǵan ınnovatsııalyq qoıylymdary úshin marapat aldy.

Baıqarym Tútenev – eńbek ardageri, professor. Ol bilim berý isine ómir boıy adal qyzmet etip, ekonomıka men áleýmettik ǵylymdar salasynda jas urpaqty tárbıeleýge qosqan úlesi úshin tanyldy.

Aıgúl Qulymbetova – bilim berý salasynyń mamany. Jastarǵa arnalǵan ınnovatsııalyq baǵdarlamalardy engizip, aýyldyq jerlerde bilimge qoljetimdilikti arttyrǵan áleýmettik jobalary úshin marapattaldy.

Bul azamattardyń eńbegi Qazaqstannyń ekonomıkalyq, mádenı jáne áleýmettik salalaryn nyǵaıtýǵa qyzmet etip otyr.

Eske salsaq, budan buryn frıstaıl mogýldan jasóspirimder arasyndaǵy álem chempıonatynda Anastasııa Gorodko jeńimpaz atandy.