Qyzylordada qansha otbasy úı kezeginde tur

QYZYLORDA. KAZINFORM – Qyzylorda qalasynda 6 sanat boıynsha 34 160 otbasy turǵyn úı kezeginde tur. 

Qalalyq turǵyn úı ınspektsııasy bóliminiń málimetinshe, onyń ishinde áleýmettik jaǵdaıy osal top ókilderi (9 247), memlekettik qyzmetshiler, bıýdjettik sala qyzmetkerleri (8 238) men kópbalaly otbasylardyń (5 743) salmaǵy basym. 

– Turǵyn úı qatynastary týraly zańdaǵy ózgeristerge sáıkes 2025 jylǵy 24 mamyrdan bastap Qazaqstan azamattaryn turǵyn úıge muqtajdar esebine qoıý qyzmetin Ulttyq damý ınstıtýty mártebesine ıe Otbasy bank júzege asyryp keledi. Osyǵan baılanysty buryn bólim quzyretinde bolǵan azamattardy esepke alý, kezekke qoıý, turǵyn úı berý týraly sheshim qabyldaý qyzmetteri tolyqtaı Otbasy bankke berildi. Ótken jyly júrgizilgen tekserý barysynda 4 714 azamat kezekten shyǵaryldy. Onyń ishinde turǵyn úıi bar azamattar sany – 4 154, 360 otbasy basqa qalaǵa kóshken, 200 otbasynyń jeńildik negizderi joıylǵan, - delingen habarlamada. 

Turǵyn úı kezeginiń ashyqtyǵyn qamtamasyz etý maqsatynda 2025 jylǵy 20 naýryzda 26 myń azamattyń tizimi buqaralyq aqparat quraldarynda jarııalandy. Al bir jylda oblys ortalyǵynda 1261 páter paıdalanýǵa berildi.

Eske salaıyq, Qyzylorda qalasynda jer kezegin saryla kútken 70 myńnan astam adamnyń aldy jyljı bastady.