Qyzylordada qansha kólemde kúrish egiletini belgili boldy

QYZYLORDA. KAZINFORM — Bıyl kóktemde Qyzylorda oblysynda 193,7 myń gektar jerge egin egiledi. Onyń 85,9 myń gektary — kúrish.

Búgingi kúni jergilikti operatorlar 10 myń tonna dızel otynynyń aqpan, naýryz aılaryna bólingen 1500 tonnasyn jetkizdi. Taǵy 843 tonnasy sharýashylyqtarǵa taratyldy.

— Ótken jyly aýyl sharýashylyǵy qurylymdary quny 8,8 mlrd teńge bolatyn 250 tehnıka satyp aldy. Sondaı-aq mashına-traktor parki jańartyldy. Aldaǵy egin maýsymy qarsańynda 4 myńnan astam tehnıka tolyq jóndeldi, - dedi oblystyq aýyl sharýashylyǵy basqarmasynyń basshysy Talǵat Dúısebaev. 

Kóktemgi dala jumysyna daıyndyq kezinde sý máselesi de baqylaýda. 2025 jylǵy 26 naýryzdaǵy Syrdarııa ózenindegi sýdyń jaǵdaıy boıynsha "Shardara" sý qoımasyna joǵarydan sekýndyna 129 tekshe metr sý túsýde. Qoımadaǵy sý kólemi — 4,6 mlrd tekshe metr. Syrdarııa ózeniniń tómengi aǵysyna sonyń 200 tekshe metri jiberilýde. Bul ótken jyldyń osy kezeńine qaraǵanda eki ese az. 

Májilis depýtaty Murat Ergeshbaev Soltústik Aral teńiziniń tartylýynan kúrish egisin qysqartýǵa týra keletinin málimdedi.