Qyzylordada qansha adam áskerge barýdan jaltaryp júr
QYZYLORDA. KAZINFORM – 1 naýryzda elimizde azamattardy kóktemgi áskerge shaqyrý naýqany bastaldy. 30 maýsymǵa deıin áskerı qyzmetke Qyzylorda oblysynan 800-den astam adam jiberiledi.
Oblystyq qorǵanys isteri jónindegi departamenttiń málimetine súıensek, onyń ishinde Qarýly kúshter qataryna 400-den astam, Ulttyq ulanǵa 300-ge jýyq, Ulttyq qaýipsizdik komıtetiniń shekara qyzmetine 100-ge jýyq, Tótenshe jaǵdaılar mınıstrligine 30-ǵa tarta, Memlekettik kúzet qyzmetine 15-ten astam jigit barýy qajet. Sarbazdardyń alǵashqy legi 17 naýryzdan bastap shekara qyzmetine attanady.
- Ótken jyly tapsyrys boıynsha 1400-den astam syrboıylyq ásker qataryna alyndy. Qazirgi kúni biz 1891 azamatty izdestirip, 224-in taptyq. Qalǵanyna qatysty izdestirý jumysy jalǵasyp jatyr. Biraq olardyń bári birdeı Otan aldyndaǵy boryshyn óteýden jaltaryp júr deı almaımyz. Keıbiriniń turǵylyqty meken jaıy ózgergen, basqa qalaǵa ketken bolýy múmkin. Osyndaı ártúrli sebepter bar, - dedi departament bastyǵy orynbasarynyń mindetin atqarýshy Nurlybek Seıithanov.
Sala ókiliniń aıtýynsha, áskerge shaqyrylǵan qyzylordalyq jastardyń shamamen 25-30%-ynyń densaýlyǵynda kinárat bar. Ásirese, kóz aýrýyna shaldyqqandardyń sany kóp.
- Densaýlyǵy jaramaıtyn jigitterdi erkinen tys áskerge tartý orynsyz. Aýrýhana, emhana esebinde turǵan, syrqaty bar azamattardy shaqyrmaımyz. Medıtsınalyq tekserýden ótý kezinde densaýlyǵyna shaǵym bildirse, dárigerlik komıssııa sheshimine sáıkes qosymsha tekserýden ótedi. Tekserý qorytyndysyna qaraı jaramdy ekeni anyqtalǵan kezde ǵana áskerge bara alady. Áleýmettik jeliden keıde kóshede, qoǵamdyq orynda kúshtep áskerge alyp ketý jaǵdaılary kórinis tapqan beınejazbalardy kózimiz shalyp qalady. Biraq mundaı jaǵdaı oblysta tirkelgen joq. Buǵan zańmen shekteý bar. Tártibi bylaı: eger shaqyrý qaǵazyn alyp, bólimge kelmese, ishki ister organdary aldymen izdeý salady. Jumys ornynan nemese turǵylyqty mekenjaıynan ǵana shaqyrý pýnktine alyp kelýge mindetti, - dedi Nurlybek Seıithanov.
Departament ókili áskerı daıyndyqtan jedel ótýdiń sharttaryna toqtaldy. Ol aıtyp otyrǵan 40 kúndik oqýǵa jasy 24-ten asqan, densaýlyǵy jaramdy, áskerı mindetin atqarýdy keıinge shegerý quqyǵy bar jigitter ǵana óz ótinishimen qatysa alady. Oqý áskerı-tehnıkalyq mektepte aqyly negizde júrgiziledi. Mektepti bitirgennen keıin áskerı kýrsty támamdaǵany jóninde kýálik beriledi. Áskerı qyzmet jáne áskerı qyzmetshilerdiń mártebesi týraly zańnyń 35-babynda áskerı qyzmetke shaqyrýdy keıinge qaldyrý sebepteri kórsetilgen. Ol azamattyń otbasylyq jaǵdaıy, bilim alý, densaýlyǵy jáne basqa da mańyzdy sebepter bolýy múmkin.
Eske salaıyq, Batys Qazaqstan oblysynda 2026 jyly 1 391 jasty merzimdi áskerı qyzmetke jiberý josparlandy.