Qyzylordada qańyrap turǵan kópqabatty úılerge gaz tartylǵan: ákimdik jaýap berdi
QYZYLORDA. KAZINFORM — Telegram áleýmettik jelisinde Qyzylorda oblysy Jańaqorǵan aýdanynyń Shalqııa kentinde qaraýsyz qalǵan kópqabatty turǵyn úıge gaz tartylǵany týraly beınejazba tarady.
Beınejazbada sóılegen azamat atalǵan kópqabatty úıdiń qańyrap bos turǵanyn atap ótti.
— Mynadaı jaǵdaıda turǵan úıge jóndeý jumysyn júrgizbeı, talapqa saı jaǵdaı jasamaı turyp byltyr gaz ákep, kirgizip qoıǵan. Bul úıde eki otbasy ǵana turady. Gazǵa qosylý úshin olarǵa kem degende 800 myń teńge qarajat kerek eken. Sondyqtan turǵyndar gazǵa qosyla almaı otyr. Meniń túsinbeıtinim, gaz tartsa, bul úılerdiń bolashaǵy bar bolǵany ma, qalaı? — dedi ol sıqy ketken úılerdi kórsetip.
Osy máselege baılanysty Kazinform tilshisi aýdan ákimdigine resmı saýalmen júgindi. Aýdan ákiminiń baspasóz hatshysy Nurbol Bákirovtiń aıtýynsha, 2023 jyly bıýdjetten bólingen 781 mln teńgege Shalqııa kenti men Quttyqoja eldi mekenine jalpy uzyndyǵy 55,5 shaqyrym gaz qubyry júrgizildi. Nysan 2024 jyldyń qańtar aıynda paıdalanýǵa berildi.
— Shalqııa kentinde barlyǵy 7 kópqabatty turǵyn úı bar. Buǵan deıin turǵyndar arasynda árkim óz páterin gaz jelisine óz qarajaty esebinen qosýy qajettigi jáne zańnama talaptaryna sáıkes jeke úılerge gaz kirgizýge bıýdjetten qarjy bólinbeıtini túsindirilgen. Qazirgi ýaqytta óz qarajaty esebinen úıine gaz kirgizgen páter ıeleri gazdy paıdalanyp otyr. Mamandar qalǵan turǵyn úı ıelerine de osylaı jasaý keregin túsindirdi, — dedi ol.
Ákimdiktiń resmı ókili taratqan málimetke sensek, kentte 7 kópqabatty turǵyn úı qatar ornalasqan. Onyń 361 páterinde 54 otbasy tursa, qalǵan 307 páter qaraýsyz qalǵan. Biraq bul páterler ıesiz degen sóz emes.
— Qaraýsyz qalǵan páter ıelerin jınaqtaý maqsatynda respýblıkalyq «Egemen Qazaqstan», oblystyq «Syr boıy» jáne aýdandyq «Jańaqorǵan tynysy» gazetteri arqyly páter ıelerine habarlandyrý berilip, nátıjesinde 161 páter ıeleriniń 30%-y ǵana baılanysqa shyqty. Atalǵan kópqabatty turǵyn úıler 1989 jyldary «Shalqııa ken basqarmasy» kásipornynyń qarjysy esebinen salynyp, turǵyndarǵa paıdalanýǵa berilgen. 1992-1995 jyldary páter ıeleriniń jeke menshigine ótken. Atalǵan páterler jeke menshikte bolǵandyqtan páter ıeleriniń ruqsatynsyz olardy satý, buzý, jóndeý jumystary júrgizilmeıdi, — dedi Nurbol Bákirov.
Buǵan deıin biz Qyzylorda qalasy Tasbóget kentiniń turǵyndary kenttegi № 4 qalalyq emhananyń tozyǵy jetkenin kópten beri aıtyp júrgenin jazǵanbyz.
