Qyzylordada qańyrap qalǵan 120 jylyjaı qateliktiń «jemisi» me
QYZYLORDA. KAZINFORM – Qyzylorda qalasynyń «ıAgodka» saıajaıyndaǵy 120 jylyjaıdyń jyry jyldar boıy jalǵasyp keledi. Kazinform tilshisi qomaqty qarjyǵa salynyp, keıin qańyrap bos qalǵan keshendi aralap qaıtty.
Áp-ádemi bolyp bastalǵan jumystyń qazirgi keıpi osyndaı. Aınalasyna jyńǵyl, ishine aramshóp qaptap ketken. Ne bar, sonyń bári tozyp tur. Oblys halqyn arzan, taza ári tabıǵı ónimmen qamtamasyz etý ıdeıasynyń qurdymǵa ketkeni ǵana kózge urady.
Qyzylorda qalalyq aýyl sharýashylyǵy jáne jer qatynastary bóliminen málimdegendeı, qala ákimdiginiń 2011 jylǵy 14 sáýirdegi №1028 jáne 2012 jylǵy 21 aqpandaǵy №3161 qaýlylarymen «ıAgodka» baý-baqsha seriktestigi mańyndaǵy aýmaqtan Aýyl sharýashylyǵyn qarjylaı qoldaý qoryna jylyjaı kesheni úshin 10 gektar jer berilgen. Oblystyq aýyl sharýashylyǵy jáne jer qatynastary basqarmasynyń basshysy Talǵat Dúısebaev táýir bastamanyń aıaqsyz qalýy áýel bastan ketken qatelikten dep sanaıdy.
– Esebi durys jasalmaǵan, oryn da durys tańdalmaǵan. Ol jer jylyjaıǵa arnalmaǵan. Kásipkerler jumys bastap kórdi, biraq esh nátıje shyǵara almady. Meniń bilýimshe, qazir sot protsesi júrip jatyr. Keshen konstrýktsııasyn bólshektep satý jóninde sheshim qabyldanǵan bolýy kerek, - deıdi.
Basqarma basshysynyń aıtýynsha, 2017 jyly Aýyl sharýashylyǵyn qarjylaı qoldaý qory arqyly qarjylandyrylǵan uıym «QazAgro» ulttyq holdınginiń enshiles kompanııasy bolǵan. 2021 jyly jeltoqsanda Agrarlyq nesıe korporatsııasyna qosylyp, taratyldy.
Jobanyń avtory, tapsyrys berýshisi, merdigeri, operatory jáne oǵan bólingen qarjy kólemi jónindegi resmı saýalymyzǵa korporatsııa basshylyǵy munyń qupııa aqparat ekenin alǵa tartyp, jyly jaýyp qoıdy.
Jobany iske asyrýǵa «Báıterek» holdıngi men Agrarlyq nesıe korporatsııasynyń qatysy joǵyn, ıaǵnı komıssııa quramynda kompanııa ókilderi bolmaǵanyn málimdedi.
– Jylyjaı lızıng alýshyǵa 2017 jyly berilgen. Zańdy tulǵa eki jyl boıy qııar, qyzanaq sııaqty kókónis ósirýmen aınalysqan. Alaıda, jylyjaıdy birneshe sebepterge baılanysty tıimdi paıdalanbaǵan. Bul joba boıynsha sybaılas jemqorlyq sıpatynda is qozǵalǵany týraly aqparat joq.
Jobany Aýyl sharýashylyǵyn qarjylaı qoldaý qory iske asyrdy. Agrarlyq nesıe korporatsııasy bul jobaǵa qarajat bólgen joq.
Shart talaptary, nesıe merzimi, jeńildik merzimi, paıyzdyq mólsherleme, bastapqy jarna, kepildik somasy týraly aqparat – kommertsııalyq qupııa. Zańdy kúshine engen sot sheshimi bar aqparatty nemese Kodekste belgilengen ózge de jaǵdaılardy qospaǵanda kommertsııalyq qupııa aqparat kásipkerlik sýbektisiniń kelisiminsiz jarııa etilmeıdi, - degen jaýap keldi korporatsııanyń basqarýshy dırektory Arman Ámirǵojınnen.
Korporatsııa sharttyq mindettemeni oryndamaǵan klıenttiń ústinen sotqa shaǵymdanypty.
– Qyzylorda oblysynyń mamandandyrylǵan aýdanaralyq ekonomıkalyq sotyna bereshekti óndirip alý jáne keıinnen lızıng nysanasyn alyp qoıý arqyly qarjy lızınginiń shartyn buzý baǵytynda talap aryz bergenbiz. Joǵarǵy Sottyń azamattyq ister jónindegi alqasynyń 2025 jylǵy 11 aqpandaǵy qaýlysymen oblystyq mamandandyrylǵan aýdanaralyq ekonomıkalyq sotynyń 2024 jylǵy 18 maýsymdaǵy sheshimi jáne oblystyq sottyń azamattyq ister jónindegi sot alqasynyń 2024 jylǵy 23 qyrkúıektegi qaýlysy osy iske sáıkes ózgertilip, korporatsııanyń ótinishi ishinara qanaǵattandyryldy, - dep jazady.
Korporatsııa basshylyǵy jylyjaı jumysyn júrgizetin ınvestor izdegenimen, jobaǵa eshkim qyzyǵýshylyq tanytpaǵan. Sóıtip keshenniń qazir tek qańqasy qalǵan. Ony qaıtadan qalpyna keltirý úshin qyrýar qarajat qajet. Al onyń anyq esebin ınvestor tabylyp, jumys bastamaı jatyp aıtý múmkin emes.
Qarjylyq lızıng shartyna sáıkes nysandy kútip-ustaý, jóndeý jáne oǵan qyzmet kórsetýdi lızıng alýshylar óz qarjysy esebinen júzege asyrýǵa tıis. Olardyń budan da basqa mindeti jeterlik.
Aınalyp kelgende korporatsııa basshylyǵy «120 jylyjaı bizdiń qaramaǵymyzda emes» dep aqtalyp otyr. Kópshilikti qyzyqtyrǵan keıbir suraqtarymyz da zańǵa tompaq eken.
Aıta keteıik, oblystyq aýyl sharýashylyǵy jáne jer qatynastary basqarmasynyń málimetine súıensek, aımaqta jalpy kólemi 12,1 gektardy quraıtyn 21 ǵana jylyjaı bar.