Qyzylordada kanaldan qyz balanyń máıiti tabyldy
QYZYLORDA. KAZINFORM — Qyzylorda oblystyq polıtsııa departamenti Shıeli aýdanynda qyz balanyń kisi qolynan qaza tabý kúdigi boıynsha iske baılanysty túsinik berdi.
Polıtsııaǵa 3 maýsym kúni keshki ýaqytta Shıeli aýdanynyń aýyl turǵyny kanaldaǵy shlıýz sýynan qyz balanyń máıiti tabylǵanyn habarlaǵan.
— Oqıǵa ornyna polıtsııa qyzmetkerleri dereý bardy. Qyz balanyń jeke basy anyqtaldy. Atalǵan derek boıynsha adam óltirý deregimen qylmystyq is qozǵaldy.
Aldyn ala anyqtalǵandaı, týystarynyń aıtýynsha, qyzy 2 maýsym kúni keshke úıinen shyǵyp ketip, qaıta oralmaǵan.
Qazirgi ýaqytta qylmysty ashý jáne kúdiktini ustaý maqsatynda tájirıbeli qyzmetkerlerden jedel tergeý toby quryldy. Oqıǵanyń mán-jaıyn anyqtaýǵa baǵyttalǵan jedel-izdestirý sharalary júrgizilip jatyr, — delingen habarlamada.
Tergeý múddesine baılanysty sotqa deıingi tergep-tekserý derekteri jarııa etilmedi. Tártip saqshylary messendjer arqyly jappaı taraǵan kisi óltirý jónindegi aqparattyń shyndyqqa janaspaıtynyn málimdedi.
— Polıtsııa azamattardy jalǵan aqparat taratpaýǵa, tek resmı aqparat kózderine senýge shaqyrady. Kórineý jalǵan aqparat taratqany úshin zańnamada jaýapkershilik kózdelgenin eskertedi. Atalǵan qylmystyq isti tergeý barysy departament basshylyǵynyń erekshe baqylaýynda, — delingen resmı habarlamada.
Al buǵan deıin áleýmettik jelide Qyzylorda qalasyndaǵy balabaqshalardyń birinde tárbıeshiniń balalardy bar kúshimen julqylap, olarmen dóreki qarym-qatynas jasaǵany aıqyn kórinetin beınejazba tarady.
