Qyzylordada kámeletke tolmaǵan qyzdy zorlaý isi boıynsha birneshe kúdikti qamaýǵa alyndy
QYZYLORDA. KAZINFORM — Qyzylordada jattyqtyrýshynyń kámeletke tolmaǵan qyzdy eki jyl boıy zorlap kelgeni týraly aqparat tarady.
Er adam mundaı áreketin qaramaǵyndaǵylardy jarysqa aparǵan kezde jasaǵan. Onysymen qoımaı ıntım vıdeo túsirip, shaǵymdanǵan jaǵdaıda muny ata-anasyna kórsetetinin aıtyp qorqytqan kórinedi. Jábirlenýshi bapkeri ózin dostaryna aqshaǵa satqanyn da jetkizgen.
Oblystyq polıtsııa departamenti kámeletke tolmaǵan qyzdy zorlaý deregi boıynsha qylmystyq is qozǵalǵanyn málimdedi.
— Qylmystyq is boıynsha eki kúdikti ustalyp, sot sanktsııasymen qamaýǵa alyndy. Qazirgi ýaqytta is boıynsha tergep-tekserý aıaqtalyp, qatysýshylar is materıaldarymen tanysyp jatyr. Budan bólek, ekinshi tarapqa qatysty adam urlaý deregi boıynsha da qylmystyq is qozǵaldy. Atalǵan is boıynsha úsh kúdikti qamaýǵa alynsa, eki kúdiktige qatysty sottyń sheshimimen úıqamaq bultartpaý sharasy qoldanyldy, — delingen habarlamada.
Tártip saqshylary istiń mán-jaıyn anyqtaýǵa kiristi. Departament basshylyǵy qylmystyq isterdiń tergelý barysyn erekshe baqylaýyna aldy.
Tergeý múddesine sáıkes ózge aqparat jarııa etilmedi.
Budan buryn Almatyda kámeletke tolmaǵan qyzǵa qatysty jasóspirimder tobynyń zańǵa qaıshy áreketteri boıynsha qylmystyq is qozǵaldy.
