Qyzylordada qalalyq baǵytqa 70 avtobýs qosyldy
QYZYLORDA. KAZINFORM – Búginde Syr óńirinde halyqtyń qolaıly turmysyna, ómir súrý sapasyn arttyrýǵa baǵyttalǵan áleýmettik jobalar júzege asyrylyp keledi. Keshe turǵyndar ótinish-tilegi eskerilip, taǵy da 70 avtobýs qalaishilik baǵytqa qosyldy. Іs-sharaǵa oblys ákimi Nurlybek Nálibaev, oblystyq máslıhat tóraǵasy Naýryzbaı Baıqadamov, ardagerler men jaýapty sala basshylary qatysty.
Aımaq basshysy qyzylordalyqtardy jańa qoǵamdyq kólikterdiń el ıgiligine tabystalýymen quttyqtady.
«Sońǵy eki jylda mektep oqýshylaryna 30 avtobýs, densaýlyq saqtaý salasyna 70 jedel járdem, ormanshylarǵa 470 tehnıka, quqyq qorǵaý organdaryna 92, veterınarlarǵa 30 qyzmettik avtokólik, elektr taratý torabyna 16 avtokólik alyndy. «Úlgili eldi meken» oblystyq konkýrsynyń jeńimpazdaryna kúndelikti el turmysyna eń qajetti degen zamanaýı úlgidegi 29 arnaıy tehnıka berildi. Oblys ortalyǵyndaǵy jolaýshylar tasymaldaý qyzmetin jaqsartý maqsatynda sońǵy eki jylda 200 jańa avtobýs aldyq. 2022 jyly 150 jańa avtobýs satyp alynsa, ótken jyly taǵy 50 úlken syıymdylyqtaǵy kólik qalalyq jáne qala mańyndaǵy baǵyttarǵa qosyldy. Osy jyly 100 jańa avtobýstyń el ıgiligine berilýi josparlansa, sonyń 70-i búgin tabystaldy. Osylaısha oblys ortalyǵyndaǵy qoǵamdyq kólik máselesin túbegeıli sheshemiz. Barshańyzdy qalalyq baǵyttarǵa qosylatyn jańa qoǵamdyq kólikterdiń tabystalýymen shyn júrekten quttyqtaımyn», – dedi Nurlybek Mashbekuly.
Іs-sharada kólik salasynyń ardageri Ómirbek Shámenov te jerlesterin quttyqtady. Aıta ketý kerek, «Qyzylorda avtobýs parki» JShS-ne qarasty úlken syıymdylyqtaǵy avtobýstarda múmkindigi shekteýli jandar, eresekter men oqýshylar úshin QR-kitap oqýǵa qolaıly jaǵdaı jasalǵan. Al avtobýstardyń kelýin «2GIS» jáne «ıAndeks GO» uıaly qosymshalary arqyly baqylaýǵa múmkindik bar.
Qazir óńirde jol-kólik salasyn damytýdyń aýqymdy jobalary júzege asyrylyp jatyr. Ótken jyly respýblıkalyq jáne oblystyq bıýdjetten 38,5 mlrd teńge bólinip, 671 shaqyrym jol jóndeýden ótti. Nátıjesinde oblystaǵy jaqsy jaǵdaıdaǵy joldyń úlesi 87,5 paıyzǵa jetti. Respýblıkalyq jáne oblystyq bıýdjetten bólingen 25 mlrd teńgege 230 shaqyrym jol jóndeledi. Jyl sońyna deıin jaqsy jáne qanaǵattanarlyq jaǵdaıdaǵy joldardyń úlesi 90 paıyzdan asady.
Qyzylorda qalasynda 975 mln teńgege zamanaýı úlgidegi avtovokzal salynyp jatyr. Halyq kópten beri másele etip kótergen Ǵ.Muratbaev jáne ıAssaýı kósheleriniń qıylysyndaǵy temirjol arqyly ótetin jaıaý júrginshiler kópiri el ıgiligine berildi.
Jurtshylyqtyń suranysyna sáıkes «Qyzyljarma» kanaly arqyly «Báıterek» shaǵyn aýdanyna ótetin kópiri ashyldy. Bıyl Qyzylorda qalasynda Jappasbaı batyr kóshesi 4 jolaqty bolyp keńeıtilip, ıAssaýı kóshesi qaıta jańǵyrtylady. Janqoja batyr kóshesinen temirjol asty kópiri salynady. Bul jobalarǵa respýblıkalyq jáne oblystyq bıýdjetten 11 mlrd teńgege jýyq qarjy qaraldy.
