Qyzylordada qala kúnine arnalǵan merekelik kontsert ótti
QYZYLORDA. KAZINFORM — Búgin sol jaǵalaýdaǵy «Qaısar Arena» stadıonynda Qala kúnine arnalǵan «Mereıli merekeńmen, Qyzylorda!» atty gala-kontsert ótti. Gala-kontsert taqyryptyq prologpen bastalyp, onda qalanyń eki ǵasyrlyq tarıhy men búgingi kelbeti, órleý joly qamtyldy.
Oblys ákimi Murat Ergeshbaev turǵyndardy merekemen quttyqtap, óńirdiń áleýmettik-ekonomıkalyq jetistikterine toqtaldy.
— Prezıdentimiz Qasym-Jomart Kemeluly: «Qyzylorda — halqymyz úshin orny erekshe aımaq. Osy ólkede Shirik Rabat, Jankent, Syǵanaq qalalarynyń orny kóne zamannyń ózinde qazaq jerinde damyǵan qala órkenıeti bolǵanyn ańǵartady. Qyzylorda — sol áıgili qalalardyń zańdy jalǵasy», — dedi.
Bul — bir ǵasyr buryn Qazaq eliniń astanasy bolǵan, ult taǵdyryna qatysty mańyzdy sheshimder qabyldanǵan qasıetti meken. Eki ǵasyrlyq tarıhy bar Qyzylorda topyraǵynda ult qaıratkerleri, Alash arystary taǵdyrsheshti qadamdarǵa baryp, bolashaqqa baǵdar jasaǵany tarıhtan belgili.
Qalamyzdyń búgingi jańarýy men kórkeıýi — sol tarıhı sabaqtastyqtyń jalǵasy. Keıingi jyldary áleýmettik jáne ınjenerlik ınfraqurylym jańǵyrtylyp, zamanaýı nysandar el ıgiligine berilýde. Óńir ekonomıkasynyń qýatyn arttyratyn iri ınvestıtsııalyq jobalar júzege asyrylýda.
Qyzylordanyń kórkeıýine erekshe úles qosqan, búginde Úkimet basshysynyń birinshi orynbasary Nurlybek Mashbekuly Sizderdi Qala kúnimen quttyqtap, ystyq yqylasyn bildirýde.
Búgingi mereıli mereke Ózderińizge arnalady. Súıikti qalamyz kórkeıe bersin! Qyzylordamyzdyń bolashaǵy jarqyn, keleshegi kemel bolsyn! Arman-maqsattarymyz oryndalsyn! Halqymyz aman, birligimiz bekem bolsyn! Mereke qutty bolsyn, qadirli jerlester! , — dedi Murat Nálqojauly.
Keshte elimizge tanymal óner ıeleri Indıra Elýbaeva, Qazybek Quraıysh, Úkitaı Ernııazov, Baljan Bıdash, «KESH YOU» toby jáne ALEM sahna tórinde óner kórsetip, kórermenderge kóterińki kóńil kúı syılady. Gala-kontsert merekelik otshashýmen qorytyndylandy.
Keıingi jyldary Qyzylorda qalasynyń ınfraqurylymy jańaryp, áleýmettik-ekonomıkalyq damý qarqyny artyp keledi. Memleket basshysynyń, Úkimettiń qoldaýynyń arqasynda iri ınvestıtsııalyq jobalar júzege asyrylyp, jańa óndiris oryndary ashylýda.
Sonymen qatar, turǵyn úıler men zamanaýı áleýmettik nysandar salynyp, el ıgiligine aınaldy. Bıyl Inklıýzıvti sport ortalyǵy, «Dostyq úıi» jáne «Quzyrettilik ortalyǵy» ashyldy. Sondaı-aq «Aı-Kerim» oqý-saýyqtyrý ortalyǵy men Botanıkalyq baq paıdalanýǵa berildi.
Qazirgi tańda Prezıdenttik kitaphana, drama teatr jáne birqatar iri medıtsınalyq nysan salynýda. «Taza Qazaqstan» jobasy aıasynda ashylǵan Prezıdent saıabaǵy turǵyndar men qala qonaqtarynyń súıikti demalys ornyna aınaldy.
Qalanyń sol jaǵalaýyn baılanystyratyn jańa avtojol kópiri men erekshe úlgidegi jaıaý júrginshiler kópiriniń qurylysy jalǵasýda. Prezıdent saıabaǵy mańynda zamanaýı akvapark qurylysy da bastaldy. Jyl sońyna deıin «Qyzylorda Arena» sport keshenin paıdalanýǵa berý josparlanyp otyr.
