Qyzylordada IV Ulttyq qaıyrymdylyq konferentsııasy ótti
QYZYLORDA. KAZINFORM – Búgin oblys ákimi Nurlybek Nálibaevtyń qatysýymen Qyzylordadaǵy Óner ortalyǵynda «Júıeli qaıyrymdylyq: Turaqtylyq, seriktestik, mura» taqyrybynda IV Ulttyq qaıyrymdylyq konferentsııasy ótti.
Memleket basshysynyń arnaıy tapsyrmasymen 2022 jyly qurylǵan «Qazaqstan halqyna» qoǵamdyq qory jyl saıyn óńirlermen, iri bıznes sýbektilerimen jáne kommertsııalyq emes uıymdarmen ózara is-qımyl sheńberinde ulttyq qaıyrymdylyq konferentsııasyn ótkizip keledi. Basqosýǵa «Qazaqstannyń Azamattyq alıansy» ZTB prezıdenti Baný Nurǵazıeva, «Qazaqstan halqyna» qorynyń basqarma tóraǵasy Lázzat Shyńǵysbaeva, oblystyq máslıhat tóraǵasy, jaýapty sala basshylary, qor qyzmetkerleri men zııaly qaýym ókilderi qatysty.
Aımaq basshysy «Qazaqstan halqyna» qoǵamdyq qorynyń óńir turǵyndaryna kórsetken qoldaýy jaıly aıtty.
Oblystyq ákimdiktiń málimetinshe, Prezıdentimiz Qasym-Jomart Kemelulynyń tikeleı bastamasymen densaýlyq saqtaý, bilim berý, áleýmettik qoldaý salalaryndaǵy máselelerdi sheshý maqsatynda qurylǵan «Qazaqstan halqyna» qoǵamdyq qorymen tyǵyz áriptestik baılanys ornatylyp, birlesken jobalar iske asyp keledi. Qor qurylǵaly beri 10 mlrd. teńgeden astam qarjy aımaǵymyzdaǵy mańyzdy áleýmettik jobalarǵa baǵyttalǵan.
Atap aıtsaq, densaýlyq saqtaý salasyna qaralǵan 4 mlrd. 800 mln. teńgege oblystyq balalar aýrýhanasynda, Jańaqorǵan, Aral aýdandarynda «Qamqorlyq» ortalyqtary ashyldy. Aral aýdanyndaǵy ortalyq qyzmetin kórshi Aqtóbe oblysynyń, Jańaqorǵan aýdanyndaǵy ortalyq qyzmetin Túrkistan oblysynyń turǵyndary da paıdalanyp, ońaltý sharalarymen qamtyldy.
Qor qajetti dári-dármek alý, ortalyqtardy jabdyqtaý, medıtsına mamandaryn shetelde oqytýǵa da qoldaý kórsetti. Oblystyq onkologııa ortalyǵyna quny 1 mlrd. 100 mln. teńge turatyn, respýblıka boıynsha 3 oblysta ǵana bar skrınıng júrgizýge arnalǵan jyljymaly medıtsınalyq keshen tabystady. Keshen qazirgi tańda óńirimizdiń shalǵaı eldi mekenderindegi turǵyndarǵa úzdiksiz qyzmet etip otyr.
«Qazaqstan halqyna» qory kelesi jyly medıtsına salasyndaǵy jobalarǵa 2 mlrd. 600 mln. teńge bólýdi josparlaǵan. Oǵan onkologııalyq aýrýlardy tıimdi emdeýge arnalǵan joǵary tehnologııalyq jabdyqtar satyp alynady.
Sondaı-aq, aýtızmge shaldyqqan jáne basqa da psıhıkalyq buzylystary bar balalardy áleýmettendirýge arnalǵan ortalyq ashylady. Ortalyq jyl saıyn 600 balaǵa qyzmet kórsetpek.
Bilim berý salasyna 2 mlrd. 600 mln. teńge bólindi. «Aýyldyq aımaqtardaǵy tirek mektepterdiń áleýetin damytý» jobasy aıasynda 2023-2025 jyldary 2 mlrd. teńge bólinip, 8 mekteptiń fızıka, hımııa, bıologııa, robototehnıka, kompıýterlik kabınetteri qaıta jabdyqtaldy, aýyl balalary jazǵy lagerlerde demaldy.
Erekshe bilim berýdi qajet etetin balalarǵa arnalǵan arnaıy ınternattardyń materıaldyq-tehnıkalyq bazasy jańǵyrtyldy. «Bolashaq ınjenerler» jobasy aıasynda 9 mektepke robototehnıka qurylǵylary alynyp, tıisti mamandar arnaıy oqýdan ótti. Qorqyt Ata atyndaǵy Qyzylorda ýnıversıtetiniń 500-den astam stýdentiniń «Kýrsera» álemdik platformasynda bilim alýyna múmkindik jasaldy.
Aldaǵy jyly bilim berý salasynda taǵy 2 mlrd. teńgeniń jobalary júzege asady. Atap aıtqanda, oblystyń 50 mektebine «Bilim-Innovatsııa» lıtseıleriniń tájirıbesi engiziledi, fızıka, hımııa, bıologııa kabınetteri jabdyqtalady, 8 shaǵyn jınaqty mekteptiń materıaldyq bazasy nyǵaıtylady.
— Qor aımaǵymyzdaǵy sport ınfraqurylymyn damytýǵa 2 mlrd. 700 mln. teńge bólip, nátıjeli jumystar atqaryldy. Bıyl 348 mln. teńgege Shıeli aýdanynyń Dosbol datqa aýylynda, Jalaǵash aýdanynyń Aqqyr aýylynda zamanaýı sport keshenderi salynyp, el ıgiligine tabystaldy. Syrdarııa, Qarmaqshy aýdandaryndaǵy sport keshenderi jańa qural-jabdyqtarmen qamtamasyz etildi. Aımaǵymyzdyń áleýmettik-ekonomıkalyq damýyna, turǵyndarymyzdyń ál-aýqatyn arttyrýǵa eleýli úles qosqany úshin «Qazaqstan halqyna» qorynyń ujymyna Syr jurtshylyǵynyń atynan taǵy da zor alǵysymyzdy bildiremiz, — dedi N.Nálibaev.
Jıynda Lázzat Shyńǵysbaeva sóz sóılep, qor qyzmetiniń mańyzdylyǵyna toqtaldy.
— Júıeli qaıyrymdylyq — bul ýaqytsha shara emes, uzaq merzimdi ózgeristerge jol ashatyn naqty is. «Qazaqstan halqyna» qory úshin bul — adamdardyń ómirin ózgertetin, bolashaqqa úmit syılaıtyn turaqty jobalar. Biz memleket, qoǵam jáne bıznes áriptestigi arqyly ǵana shyn máninde eleýli nátıjelerge qol jetkize alamyz. IV konferentsııa — bul úsh jyldyq eńbektiń qorytyndysy ǵana emes, jańa kezeńniń bastaýy. Bul — tájirıbe almasý, birlesken sheshimder izdeý jáne qordyń óńirlerge kórsetken naqty kómegin tanystyrý alańy. Munyń barlyǵy keler urpaqtyń murasyna aınalady, — dep atap ótti.
Aıtýly sharaǵa elimizdiń barlyq óńirinen kelgen 500-ge jýyq delegat qatysty.
Konferentsııa mazmuny «Turaqtylyq», «Seriktestik» jáne «Mura» atty úsh negizgi bólimnen turady, árbir bólim júıeli qaıyrymdylyqtyń mańyzdy bir qyryn ashyp kórsetýdi maqsat etken. Qordyń qoldaýyna ıe bolǵan 12 azamat óz oqıǵalary týraly, ıgi istiń ómirinde, ujymynda qandaı oń ózgeristerge jol ashqanyn aıtyp berdi.
Óner ortalyǵynyń foıesinde ótken «Qazaqstan halqyna» qorynyń jobalar kórme-jármeńkesi bilim berý, densaýlyq saqtaý jáne áleýmettik qoldaý salasyndaǵy bastamalardy biriktirdi. Qonaqtarǵa jańa jabdyq qana emes, ózgeristerdiń naqty nátıjeleri kórsetildi.
Aıta keteıik, búginde qordyń jáne oblystyq bıýdjettiń qarjysyna qalamyzdyń sol jaǵalaýynda quny 2 mlrd. 900 mln. teńge bolatyn múmkindigi shekteýli jandarǵa arnalǵan dene shynyqtyrý-saýyqtyrý kesheniniń qurylysy qarqyndy júrýde. Nysan aldaǵy qazan aıynda paıdalanýǵa beriledi.
Kelesi jyly 6 sport mektebi jabdyqtalady. Múgedektigi bar balalar men jastar ınnovatsııalyq protezdik-ortopedııalyq quraldarmen qamtamasyz etildi. «Úı jaǵdaıynda múgedektigi bar balalardy ońaltý» jobasy aıasynda 283 mln. teńgege 95 qural-jabdyq satyp alyndy. Qarmaqshy aýdanyndaǵy múmkindigi shekteýli balalarǵa áleýmettik qyzmet kórsetetin «Dámetken Ana» ortalyǵynyń materıaldyq bazasy nyǵaıtyldy. Búginde ortalyqta ońaltý qyzmetin alatyn 30 bala bar.