Qyzylordada ystyq sýmen jabdyqtaý jumystaryna Úkimet rezervinen 5 mlrd teńge bólindi
ASTANA. KAZINFORM - Memleket basshysynyń tapsyrmalaryn júzege asyrý aıasynda Qyzylorda oblysynyń bıýdjetine ystyq sýmen jabdyqtaý jelilerin salý úshin Úkimet rezervinen nysanaly transfertter túrinde shamamen 5 mlrd teńge bólindi. Tıisti qaýlyǵa Premer-mınıstr Oljas Bektenov qol qoıdy. Bul týraly Úkimettiń baspasóz qyzmeti habarlady.
Búginde Qyzylorda qalasy – ortalyqtandyrylǵan ystyq sýmen jabdyqtaý júıesi joq respýblıkadaǵy jalǵyz oblys ortalyǵy. Qaladaǵy kóp qabatty úıler elektr jylytý nemese gaz jylytý qurylǵylary arqyly ystyq sýmen qamtamasyz etiledi. Bul óz kezeginde tótenshe jaǵdaılarǵa ákelýi múmkin.
Memleket basshysy Qasym-Jomart Toqaev 2023 jylǵy 10 qazanda óńirge jumys sapary barysynda qalany 2025 jyldyń sońyna deıin ortalyqtandyrylǵan ystyq sýmen jabdyqtaý júıesimen qamtamasyz etý máselesin sheshýdi tapsyrǵan bolatyn.
Jalpy quny 26,2 mlrd teńge bolatyn tıisti jobany júzege asyrý eki kezeń boıynsha josparlanǵan. Birinshi kezeń – 2024 jyly 187 turǵyn úıdi sý júıesimen qamtý jumystary bastaldy.
Ekinshi kezeńde bıyl 236 turǵyn úı sý júıesine qosylady. 2024 jyly birinshi kezeńge Úkimet rezervinen 11 mlrd teńgeden astam qarajat baǵyttaldy.
Atalǵan qaýly negizinde Úkimet rezervinen bólingen 5 mlrd teńge bıyl ekinshi kezeńniń birinshi kezektegi jumystary úshin paıdalanylady.
Osylaısha, jobany júzege asyrý nátıjesinde Qyzylorda qalasynyń 423 kóp qabatty turǵyn úıi ortalyqtandyrylǵan ystyq sýmen jabdyqtaý júıesine qosylady.
Aıta keteıik, qurylysy 5 jyl buryn toqtap qalǵan Qyzylorda sý toraby paıdalanýǵa berildi.