Qyzylordada ınvestorlar qandaı iri zaýyttardy ashady

ASTANA. KAZINFORM — Aldaǵy úsh jylda Qyzylorda oblysynda 2 trln 800 mlrd teńgege 98 ınvestıtsııalyq joba júzege asyrylyp, 12 myńnan astam jańa jumys oryndary ashylady. Oblystaǵy iri jobalar jóninde ákim Nurlybek Nálibaev aıtyp berdi. 

Ákimniń aıtýynsha, bıyl 300 mlrd teńgeden astam qarjyǵa 27 ınvestıtsııalyq joba iske qosyldy.

— Shilde aıynda 5 mlrd teńgege tolyq avtomattandyrylǵan «Qyzylorda Saz-M» seriktestiginiń kirpish zaýyty ashyldy. Zaýyt jylyna 90 mln kirpish shyǵaryp, jergilikti qurylysqa qajetti suranystyń 90 paıyzyn qamtamasyz etedi. «Qyzylorda Nan» seriktestiginiń nan, kondıterlik-makaron ónimderin óndiretin kesheni iske qosyldy. Keshenniń jalpy quny — 5 mlrd 600 mln teńge. Budan bólek, 753 mlrd 300 mln teńge bolatyn 14 iri jobanyń qurylysy bastalyp jatyr, — dedi N. Nálibaev elordada Ortalyq kommýnıkatsııalar qyzmetinde.

Іri jobalar arasynda 414 mlrd 700 mln teńgege «Shalqııa» ken-baıytý fabrıkasy; 161 mlrd 400 mln teńge bolatyn — «Kaltsılengen soda» zaýyty; 60 mlrd teńgege — «Seven Rıvers» kompanııasynyń bótelke shyǵaratyn zaýyty; 37 mlrd 800 mln teńge bolatyn — ońtústik koreıalyq «Ýız ıÝ» kompanııasynyń turmystyq qatty qaldyqtar óńdeý zaýyty bar.

— «Tabıǵı tas Qyzylorda» seriktestigimen 17 mlrd 300 mln teńgege jylyna 1 mln tonna ák shyǵaratyn zaýyt kelesi jyly iske qosylady. Ótken aptada ǵana ıspandyq «Roka grýpp» kompanııasymen jylyna 500 myń buıymǵa deıin sanıtarlyq-tehnıkalyq ónimder shyǵaratyn joǵary tehnologııalyq zaýyt salý jóninde ınvestıtsııalyq kelisimge qol qoıyldy. Elimizde salynatyn alǵashqy zaýyttyń quny 44 mlrd teńgeni quraıdy. Onda 300-ge jýyq jańa jumys oryndary ashylady, — dedi oblys ákimi.

Sonymen birge, 134 mlrd 500 mln teńgege «Fabe-Agro» kompanııasymen birlesip, jylyjaı salý jobasy júzege asyrylady.

Óńirde agrarlyq-ındýstrııalyq klaster qurý maqsatynda 51 mlrd teńgege shveıtsarııalyq «Harvest Agro» kompanııasymen tehnıkalyq qara sora, júgeri men soıany ósirý, qaıta óńdeý jáne 40 mlrd teńge bolatyn júgeri daqylyn tereń óńdeıtin krahmal-sirne zaýytynyń qurylysy bastaldy.

Aıta keteıik, bıyl Qyzylorda oblysynyń bıýdjeti 851 mlrd teńgeden asty. Bıýdjet qarajatyn ońtaılandyrý maqsatynda 2022 jyldan bastap áleýmettik salaǵa tereń taldaý júrgizilgen. Nátıjesinde 108 mlrd teńge qarjy únemdelgen.

Bıyl Qyzylordaǵa 750 mlrd teńgeden astam ınvestıtsııa tartylady.