Qyzylordada ınvestorǵa zańsyz shara qoldanǵan basqarma basshysyna aıyppul salyndy
ASTANA. KAZINFORM — Olardyń árqaısysyna 432 500 teńge mólsherinde aıyppul salyndy.
Qyzylorda qalasynyń prokýratýrasy negizsiz jedelden qoıý sharasy qoldanylǵan ınvestor — «TEMA RETAILKZ» JShS-niń quqyqtaryn qorǵaý boıynsha sharalar qabyldady.
Atap aıtqanda, Qyzylorda qalasynyń sanıtarııalyq-epıdemıologııalyq baqylaý basqarmasy atalǵan sharany prokýratýra organdarymen aldyn ala kelispeı qoldanǵan. Bul rette tıisti sheshim kelisýge ony qabyldaǵannan keıin ǵana joldanǵan.
Prokýratýra júrgizgen tekserý nátıjesinde sheshimniń negizsizdigine baılanysty ony kelisýden bas tartyldy.
Anyqtalǵan zań buzýdy joıý maqsatynda qala prokýratýrasy Qyzylorda oblysynyń sanıtarııalyq-epıdemıologııalyq baqylaý departamentine prokýrorlyq qadaǵalaý aktisin engizdi. Atalǵan aktini qaraý nátıjesinde ınvestorǵa qatysty zańsyz qoldanylǵan jedel den qoıý sharasynyń kúshi joıyldy.
Sonymen qatar kásipkerlik qyzmetke zańsyz aralasqany úshin qalalyq basqarmanyń basshysy men bas mamany Ákimshilik quqyq buzý týraly kodekstiń 173-babynyń 1-bóligi boıynsha ákimshilik jaýapkershilikke tartyldy. Olardyń árqaısysyna 432 500 teńge mólsherinde aıyppul salyndy.
Aıta ketelik sheteldik ınvestordyń banktik shottary zańsyz buǵattalǵany anyqtalǵan edi.
