Qyzylordada ınvataksı qyzmetine qatysty shaǵym kóp

QYZYLORDA. KAZINFORM – Qyzylorda oblysynda múmkindigi shekteýli adamdar sany 34 myńnan asady. Alaıda, olar úshin kedergisiz orta tolyq qurylyp, qalyptasty deı almaımyz.  Ásirese, júrip-turýy muń jandar ınvataksı jetispeýshiligin jıi alǵa tartady. Solardyń biri – týabitti sal aýrýyna shaldyqqan І top múgedegi – Záýre Óksimbaeva. 

инватакси
Фото: Алматы мәслихаты

Keıipkerimiz arnaıy kólik oqıtyn, jumys isteıtin taǵdyrlastarynan aýyspaıtynyn aıtty. 

– Invataksı qyzmetin kúndelikti qoldana almaımyz. Qajet kezde shaqyrǵanmen, kelip úlgermeıdi. Keshki saǵat altydan keıin mádenı is-sharalarǵa, kontsertterge aparmaıdy. Temirjol, áýejaıdan adam shyǵaryp salatyn nemese kútip alatyn bolsaq, eki-úsh kún buryn ótinish bildiremiz. Qandaı da bir mekemege nemese basqa jerge baratyn bolsaq ta solaı, - deıdi ol. 

Oblystyq jumyspen qamtýdy úılestirý jáne áleýmettik baǵdarlamalar basqarmasynyń málimetinshe, ótken jyly óńirde 45 avtokólik ınvataksı qyzmetin júzege asyrdy. 

– Onyń 26-sy aýdandarda, 3-i Baıqońyr qalasynda, 16-sy Qyzylorda qalasynda júr. 45 ınvataksıdiń 11-i kreslo-arbamen júretin adamdarǵa arnalǵan. Kólikter qyzmetin qamtamasyz etýge bıýdjetten barlyǵy 145,3 mln teńge bólinip, jyl kóleminde 2 myńǵa jýyq adam ınvataksı qyzmetin paıdalandy. Bıyl 51 kólik qyzmetine 211,6 mln teńge bólindi, - dedi basqarmanyń bólim basshysy Gúlshat Ábdihalyqova. 

Qyzylorda qalasynyń turǵyny Nazerke Qadirova erekshe qajettiligi bar bala tárbıelep otyr. Sondyqtan ınvataksıdiń bala demeı, úlken demeı birdeı berilgenin ári jetkilikti bolǵanyn qalaıdy. 

– Balalarym úshin surap kórgen emespin. Biraq únemi osyndaı jandardyń máselesine aralasyp júrgesin bilemin. Arnaıy kólikti І, ІІ top múgedekterine ǵana beredi. Áıtse de bári birdeı paıdalana almaıdy. Invataksıge minip kórmegender qanshama?! Kerisinshe odan túspeı bazar aralap, azyq-túlik alyp júretinder bar. Bulaı bolmaıdy, - dedi keıipkerimiz.

QR Adam quqyqtary jónindegi ýákildiń oblystaǵy ókili Berikbol Baıqojaev byltyr ınvataksı qyzmeti 207 myń retten kóp paıdalanylǵanyn jetkizdi. Alaıda tapshylyq jóninde aryzdanǵan eshkim bolmapty. 

Jastaıynan múgedekter arbasyna tańylǵan Kúlpash Kúnshyǵarova óz basynda mundaı másele bolmaǵanyn tilge tıek etti. 

– Invataksıge taksı tappaǵanda, qysyltaıań kezde tapsyrys beremin. Barynsha taýyp berýge tyrysady, - dedi І top múgedegi. 

«Qyzylorda oblystyq múgedekter qoǵamy» qoǵamdyq birlestiginiń tóraǵasy Saǵatbek Qýanyshbaıuly uıymǵa shaǵymdanǵandar baryn jasyrmady.

– Invataksı kategorııaǵa bólinedi. Biz tirek-qımyl apparaty buzylǵan eresekter men balalardy tasımyz. Avtokólikter arasynda isten shyqqany joq. Alaıda qolda bardyń basym bóligi zaýyttan talaı jyl buryn shyqqan. Kóbi jóndeýdi, keıbiri kúrdeli jóndeýdi qajet etedi. Shaǵym tússe, máseleniń neden týyndaǵanyn der kezinde anyqtap, jumys júrgizemiz. Múmkindigi shekteýli adamdardyń usynys-tilekteri eskerýsiz qalmaıdy, - dedi ol.

Oblysta ınvataksı jumysyn osy qoǵamdyq birlestik uıymdastyrady. 

Aımaq basshysynyń usynysyna sáıkes ótken jyly «Halyq bank» AQ «100 ıgi is» naýqany aıasynda Qyzylorda jáne Baıqońyr qalalaryna eki ınvataksı kóligin syıǵa tartty. 

– Sonda da tapshylyqtyń tyıylmaý sebebi múgedektigi bar balalar sanynyń kóbeıýimen baılanysty bolyp otyr. Ata-analar olardy ońaltý, túzetý ortalyqtaryna aparady. Úlkender jaǵy áleýmettik oryndarǵa, emhana, aýrýhanaǵa qatynaıdy. Invataksıler bosamaıdy. Senbi men jeksenbide, mereke kúnderi kezekpen shyǵady, - dedi Saǵatbek Qýanyshbaıuly. 

Mán beretin taǵy bir jáıt, múmkindigi shekteýli jandarǵa ınvataksı tek óziniń turǵylyqty jerinde qyzmet kórsetedi. Eger ol basqa óńirge barsa, ondaı qyzmetten qaǵylady. Bul máseleni Parlament Májilisiniń depýtaty Edil Jańbyrshın Úkimet nazaryna usynǵan bolatyn. Biraq áli túıini tarqatylǵan joq. 

– Múgedektigi bar adamdarǵa servıstik qyzmet kórsetý problemasy bar. Mysaly, árbir óńirden, aýyl-aımaqtan kún saıyn Astanaǵa, Almatyǵa ne basqa qalaǵa kýrorttyq, medıtsınalyq ońaltý, saýyqtyrý, emdelý úshin múgedektigi bar adamdar aǵylyp jatady. Olar ushaqpen ushyp keledi. Qalada olardy arnaıy kólik kútip almaıdy. Jergilikti ınvataksı qalada turaqty turmaıtyn, ózge óńirdiń turǵyny sanalatyn qazaqstandyqtarǵa qyzmet kórsetpeıdi, – dedi depýtat.

Eske salsaq, byltyr elimizde múgedektigi bar adamdar ınvataksı qyzmetine 179 myńnan astam tapsyrys berdi.

Сейчас читают