Qyzylordada ınvataksı qat: másele nede
QYZYLORDA. KAZINFORM – Qyzylorda qalasynda turatyn múmkindigi shekteýli jandar ınvataksı tapshylyǵyn tartyp otyr. Kazinform tilshisi máseleniń jaı-japsaryn zerttep kórdi.
Qalalyq jumyspen qamtý jáne áleýmettik baǵdarlamalar bóliminiń málimetine súıensek, múgedektigi bar adamdar sany 14,5 myńnan asady. Onyń 2 myńǵa jýyǵy – І top, 4,5 myńnan kóbi – ІІ top, 6,5 myńǵa jýyǵy – ІІІ top múgedegi, 1800-deıi – 18 jasqa tolmaǵan balalar. І toptaǵy 200-den astam adam sozylmaly búırek jetispeýshiligi aýrýyna shaldyqqan.
- Qalada 682 adam 26 ınvataksı kóligin paıdalanady. Invataksı qyzmeti tirek-qımyl apparaty buzylǵan, arbada otyratyn múgedekterge, múgedektigi bar balalarǵa, kórý qabileti nashar jáne údemeli búırek jetispeýshiligi saldarynan múgedektigi bar adamdarǵa kórsetiledi. 2025 jylǵy memlekettik satyp alý nátıjesine sáıkes ınvataksı qyzmetin 2 úkimettik emes uıym júzege asyryp keledi. Tirek-qımyl apparaty buzylǵan, arbada otyratyn múgedekter men múgedektigi bar balalar «Qyzylorda oblystyq múgedekter qoǵamy» qoǵamdyq birlestiginiń 6 avtokóligin qoldanady. «Orda Qaısarlary» múgedekter qoǵamdyq birlestigi kórý qabileti nashar turǵyndarǵa 10 avtokólikpen qyzmet kórsetedi. Mamyr aıynan bastap jasalǵan kelisimshart negizinde qyzmet kórsetý aıasy keńeıdi. Qosymsha 10 avtokólik gemodıalız protsedýrasyn alatyn adamdardy turaqty túrde tasyp júr, - dedi bólimniń múgedektigi bar adamdardy áleýmettik qoldaý sektorynyń basshysy Ardaq Álqojaeva.
Degenmen qamkóńil jandar arnaıy kólikterdiń qat ekenin qanshama jyldan beri kóterip júr. Taǵdyrlastarynyń máselesin joǵaryda aıtylǵan úkimettik emes uıymdardyń biri – oblystyq múgedekter qoǵamyn basqaratyn І top múgedegi Saǵatbek Sııýov jetkizdi.
- Bul qyzmetke men 2021 jyldyń aıaq jaǵynda keldim. Invataksı jetispeýshiligin 2023 jyly oblys ákimi Nurlybek Nálibaevtyń jeke qabyldaýynda kóterdim. Jyl sońyna qaraı úlken syıymdylyqtaǵy 2 avtokólik berildi. Onyń birin oblys ortalyǵyna qaldyryp, ekinshisin Baıqońyr qalasyna jiberdik. Sonymen 5 kólik qyzmet kórsetedi. Taǵy bir 7 oryndy jaldamaly kólik negizinen balalardy tasymaldaıdy. Invataksı tirek-qımyl apparaty buzylǵan, zaǵıp jáne búırek jetispeýshiligi aýrýyna shaldyqqan jandarǵa arnalǵan bolyp 2 sanatqa bólinedi. Bizdiń uıymǵa bekitilgen kólikter júrip-turýy qıyn jandardy tasıdy. Biraq ol bárine birdeı jetpeıdi. Sońǵy satyp alynǵanynan basqasy eski, on jyldan asyp ketken, - dedi ol.
Barlyǵy – reseılik marka, al qazir kólik naryǵyn Qytaıdan ákelinetin qosalqy bólshekter jaýlap alǵan. Qansha jóndese de, tez buzylady. Kólikke tehnıkalyq qyzmet kórsetý, janar-jaǵarmaımen qamtý – qyrýar aqsha. Jyl basynda bólingen aqsha jyl sońyna deıin jetpeı tıtyqtatyp bitken.
- Jaýapty sala basshylaryna bul máseleni talaı jetkizdim. Ótken jyly qazan, qarasha, jeltoqsan aılarynda janar-jaǵarmaıǵa, jóndeý jumystaryna qarjy jetpeı qaldy. Jobany ózim jeńip alǵan soń ózim aıaqtap shyqtym. Byltyr taǵy qaıtalandy. Jyl basynda qalalyq jumyspen qamtý bólimimen kelisimshart jasastyq. Jyl basynda A-92 benzıni 210 teńgeden satylsa, qazir 225 teńgeden. Avtogaz 80-85 teńge bolsa, mekemelerge 107 teńgeden satylyp jatyr. Qarjy bólingende qymbatshylyq eskerilmegen. Tehnıka jóndetý tipti qymbat. 1 sáýirden bastap saqtandyrý polısiniń baǵasy birden sharyqtap shyǵa keldi. Ekinshi túıin, qala aýqymy jyl ótken saıyn keńeıip keledi. Bul – bizdiń ortalyqtyń qyzmetin tutynatyn adamdar sany artyp keledi degen sóz. Ótken jyly da, aldyńǵy jyly da qalalyq máslıhat depýtattaryna, qalalyq jumyspen qamtý bólimine jetkizdim. Biraq jyl sońyna deıin qarjy joǵyn aıtty. Sońǵy statıstıka boıynsha oblystaǵy múgedektigi bar adamdar sany 33 myńnan asty. Balalar da kóbeıgen. Ata-anasy olardy únemi em-dom úshin anda-munda aparady. Suranysty tolyq qanaǵattandyrmaǵan soń olar bizge renjıdi. Invataksı paıdalanýǵa shekteý qoıylmaǵan. Senbi, jeksenbi kúnderi de taǵdyrlastarymyzdy ótinishi boıynsha vokzal, avtovokzal, áýejaıǵa jetkizemiz. Júkteme kóp bolǵanymen kólik júrgizýshileriniń jalaqysy áli sol kúıi. Aılyǵy az bolǵan soń jumysqa adam turaqtamaıdy. Bulaı jalǵasa berse, qyzmet kórsetýdi toqtatýǵa týra keledi, - dedi keıipkerimiz.
Qalalyq jumyspen qamtý jáne áleýmettik baǵdarlamalar bólimi oblystyq múgedekter qoǵamynyń teńgerimindegi 2 avtokólik úshin jyl boıǵy kezekti jóndeý jumysyna 1046,4 myń teńge jumsalyp, aýdarylǵanyn habarlady.
- Memlekettik satyp alý shartyna sáıkes ónim berýshi shartta kórsetilgen qarjy sheginde jyl sońyna deıin qyzmet kórsetýge mindetti. Úkimettik emes uıym qajettilikke qaraı ınvataksı sanyn kóbeıtý týraly usynys bere alady. Usynys jergilikti bıýdjettiń múmkindigine qaraı qarastyrylady, - dedi bólimniń sektor basshysy.
І top múgedegi Baqytjan Qadyrov qalalyq ınklıýzıvti teatrǵa jetekshilik etedi. Qalanyń o shetinen sonaý basyna kúnde jumysqa qatynaıdy. Kólik tapshylyǵy oǵan talaı zııanyn tıgizgen.
- Oblysta, onyń ishinde Qyzylorda qalasynda múmkindigi shekteýli adam kóp, al ınvataksı sanaýly. Meni tasıtyn «Gazel» eski bolǵan soń eki kúnniń birinde buzylady. Keıde keshigip keledi, keıde tipti kelmeıdi. Qysta buzylsa qıyn, dalada qalasyń. Jumysqa, basqa da qalaǵan jerime jetýge bóget bolady, - dedi keıipkerimiz.
Oblys ortalyǵynda oqıtyn, jumys isteıtin, sportpen shuǵyldanatyn kembaǵal jandar kóbeıgen. Tehnıkanyń aty – tehnıka, kúndelikti júrip-turǵan soń buzylyp qalyp jatady. Al bul olardyń josparyn oryndaýǵa kedergisin tıgizedi.
- Biz negizi І toptaǵy tirek-qımyl apparaty bar balalar men eresekterdi tasımyz. Bul sanatqa jatpaıtyn adamdar, olardyń ata-analary renish bildirip jatady. Qarjy kólemin kóbeıtip, kóptep kólik bólse, bárine birdeı qyzmet kórseter edik, - dedi Saǵatbek Sıov.
Buǵan deıin biz Aqmola oblysynda múgedektigi bar adamdardy tasymaldaýǵa arnalǵan arnaıy avtobýstar tolyq paıdalanylmaı otyrǵanyn jazǵanbyz.