Qyzylordada «Halyqtyq Konstıtýtsııa — qýatty memleket» taqyrybynda sarapshylar kezdesýi ótti
QYZYLORDA. KAZINFORM – Búgin «Dostyq úıinde» oblys ákimi Nurlybek Nálibaevtyń qatysýymen Respýblıkalyq referendým aıasynda «Halyqtyq Konstıtýtsııa — qýatty memleket» taqyrybynda sarapshylar kezdesýi ótti.
Oǵan máslıhat depýtattary, quqyq qorǵaý organdarynyń, basqarmalar men aýmaqtyq departamentterdiń basshylary, bıznes qaýymdastyǵynyń ókilderi, joǵary oqý oryndarynyń ǵalym-ustazdary, saıası partııa jetekshileri, úkimettik emes uıymdar, Assambleıa músheleri, jastar, buqaralyq aqparat quraldarynyń ókilderi qatysty.
Aımaq basshysy konstıtýtsııalyq reformanyń mańyzdylyǵyna toqtalyp, jalpyhalyqtyq referendýmnyń el bolashaǵy úshin aıryqsha mánge ıe ekenin atap ótti.
— Konstıtýtsııalyq reforma jónindegi jalpyhalyqtyq talqylaýlar jarty jylǵa jýyq ýaqyt ártúrli alańdarda ótti. Bul — qoǵamnyń saıası belsendiligi men azamattyq jaýapkershiliginiń aıqyn kórinisi. El taǵdyryna qatysty mańyzdy sheshimderdi halyqtyń tikeleı daýys berýine usyný — demokratııanyń shynaıy ári myzǵymas qaǵıdaty.
Jańa Konstıtýtsııa jobasynda memleketimizdiń irgeli negizderi, basty qundylyqtary men dúnıetanymdyq ustanymdary júıelenip, zamanaýı talaptarǵa saı jańǵyrtyldy.
Jalpyhalyqtyq referendým Táýelsiz Qazaqstannyń aldaǵy damý kezeńin aıqyndap, el tarıhynda jańa belestiń bastalýyna negiz bolady dep senemiz.
Prezıdentimizdiń bastamasymen elimizde sońǵy jyldary qolǵa alynǵan saıası reformalardy júzege asyrýda Syr óńiri bereke-birliktiń, tatý tirliktiń úlgisin kórsetip keledi.
Ultymyzdyń tarıhyna altyn árippen jazylatyn aldaǵy mańyzdy saıası kezeńde Syr jurtshylyǵy elimizdiń shynaıy patrıoty retinde azamattyq ustanymdaryn bildirip, jańa Konstıtýtsııanyń jobasyn qoldaıdy dep senemiz. Barshańyzdy osy iske joǵary jaýapkershilikpen belsendi atsalysýǵa shaqyramyn, — dedi Nurlybek Nálibaev.
Jıynda oblys prokýrory Rızabek Kárimuly, Senatorlar keńesiniń múshesi Murat Baqtııaruly, Qorqyt ata atyndaǵy Qyzylorda ýnıversıtetiniń basqarma tóraǵasy-rektory, tarıh ǵylymdarynyń kandıdaty Naýryzbaı Seıitqalıuly, bilim salasynyń ardageri Raıkúl Mansurqyzy, Qazaqstannyń Azamattyq Alıansy qaýymdastyǵy oblystyq fılıalynyń tóraıymy, oblystyq qoǵamdyq keńes múshesi Anar Jarylqasynqyzy, «Anaǵa taǵzym» ortalyǵynyń dırektory Altynaı Bekmaǵambetqyzy pikir aıtty.
Sondaı-aq, jıyn sońynda pikir bildirgen oblys turǵyny, mektep ustazy Mahambetáli Ábdihamıtuly Konstıtýtsııanyń jańa jobasyndaǵy «Gımn» sózin «Ánuran» dep aýystyrý týraly usynysy Konstıtýtsııalyq komıssııa otyrysynda qaralyp, oń sheshimin tapqanyna rızashylyǵyn bildirdi.
— Elimizdiń ár azamaty óz úniniń estilgenin qalaıdy. Men qarapaıym aýyl turǵyny retinde tarıhı kezeńde óz usynysymdy bildirdim jáne onyń qabyldanǵanyna qýanyshtymyn, — dedi Shıeli aýdanynyń turǵyny Mahambetáli Ábdihamıtuly.