Qyzylordada Green Aral: Volunteers for Life 2026 halyqaralyq volonterler aptalyǵy bastaldy
QYZYLORDA. KAZINFORM — Qyzylordada Aral óńiriniń tabıǵatyn saqtaýǵa jáne ekojúıesin qorǵaýǵa baǵyttalǵan Green Aral: Volunteers for Life 2026 halyqaralyq volonterler aptalyǵynyń ashylý rásimi ótti.
Bastama Memleket basshysy Qasym-Jomart Kemeluly Toqaevtyń usynysymen BUU jarııalaǵan Turaqty damý maqsatyndaǵy Halyqaralyq volonterler jylyna oraı uıymdastyryldy.
Jıynnyń ashylý rásimine oblys ákiminiń birinshi orynbasary Danııar Janalınov, Qazaqstan Respýblıkasy Mádenıet jáne aqparat mınıstrligi Azamattyq qoǵam isteri komıteti tóraǵasynyń orynbasary Toǵjan Zeıdenova, Qazaqstan Halyq Keńesiniń músheleri Vera Kım men Janar Bımuratqyzy, oblystyq qoǵamdyq keńes tóraǵasy Naýryzbaı Baıqadamov, sondaı-aq Ózbekstan, Qyrǵyzstan jáne Qazaqstannyń 10 óńirinen kelgen 100 volonter jáne oblystaǵy 500-den astam belsendi stýdentter men erikti jastar qatysty.
Jıynda oblys ákiminiń birinshi orynbasary Danııar Janalınov qatysýshylardy «GREEN ARAL» halyqaralyq volonterler aptalyǵynyń ashylýymen quttyqtap, volonterliktiń el ómirindegi mańyzyna toqtaldy.
— Búgingi basqosýdyń Syr óńirinde ótýi jáne aptalyqtyń «GREEN ARAL» dep atalýy aıryqsha mánge ıe. Bul — qorshaǵan ortany qorǵaýǵa, ekologııalyq mádenıetti qalyptastyrýǵa jáne Aral óńiriniń taǵdyryna degen ortaq jaýapkershilikti sezinýge úndeıtin mańyzdy bastama. Aral máselesi — elimizdiń ǵana emes, búkil álemniń nazaryndaǵy ózekti taqyryp. Tabıǵatqa janashyrlyq tanytyp, ekologııalyq túıtkilderdiń sheshimine úles qosý — barshamyzǵa ortaq mindet. Syr eline kelgen saparlaryńyz sátti, júzdesýlerińiz mazmundy, bastamalaryńyz nátıjeli bolsyn! , — dedi Danııar Erenǵalıuly.
Sondaı-aq, aımaqtaǵy volonterlik qozǵalystyń órkendeýine úles qosyp, qoǵamdyq jumystarda belsendilik tanytyp júrgen birqatar azamattar oblys ákiminiń «Alǵys hatymen» marapattaldy.
Shara aıasynda Qazaqstan Respýblıkasy Mádenıet jáne aqparat mınıstrligi Azamattyq qoǵam isteri komıteti tóraǵasynyń orynbasary Toǵjan Zeıdenova sóz sóılep, volonterler bastamalaryn qoldaýdyń mańyzyn atap ótti.
Al «Ulttyq volonterlik jeli» tóraǵasy, Qazaqstan Halyq Keńesiniń múshesi Vera Kım Qazaqstan Halyq Keńesiniń tóraǵasy Erlan Qoshanovtyń arnaıy quttyqtaý hatyn oqyp berdi.
Aptalyq jastar arasynda volonterlik qozǵalysty damytýǵa, ekologııalyq mádenıetti qalyptastyrýǵa jáne halyqaralyq yntymaqtastyqty nyǵaıtýǵa baǵyttalǵan.
Baǵdarlama barysynda qatysýshylar tájirıbe almasyp, ekologııalyq bastamalaryn tanystyrady. Budan bólek, olar qorshaǵan ortaǵa qatysty ózekti máselelerdi birlesip sheshý joldaryn qarastyrady. Negizgi is-sharalar Qyzylorda oblysynyń Aral aýdanynda ótedi.
Aptalyq aıasynda belsendi jastardyń tájirıbe almasý jáne bir-birimen baılanysyn nyǵaıtý maqsatynda KZO Camp: One Community respýblıkalyq volonterler sleti de ótti.
Green Aral: Volunteers for Life 2026 halyqaralyq aptalyǵy jastardyń, qoǵamdyq uıymdar men halyqaralyq seriktesterdiń basyn qosyp, ekologııalyq volonterlikti damytýǵa jáne Aral óńiriniń tabıǵatyn qorǵaýǵa baǵyttalǵan bastamalardy qoldaýǵa jol ashady.
