Qyzylordada ǵylym men óndiristi ushtastyrý máseleleri talqylandy
QYZYLORDA. KAZINFORM – Qyzylordada QR Ulttyq ǵylym akademııasy prezıdıýmynyń kóshpeli otyrysy ótti.
Jıynda Memleket basshysynyń Joldaýyndaǵy tapsyrmalardy iske asyrý, ekonomıkanyń shıkizattyq modelinen ónimdi tereń óńdeýge kóshý, sý resýrstaryn tıimdi paıdalaný, tsıfrlyq tehnologııalardy engizý jáne óńirlik ǵylymnyń rólin kúsheıtý máseleleri talqylandy.
Otyrysqa oblys ákiminiń birinshi orynbasary Danııar Janalınov, oblys ákiminiń orynbasary Ardaq Zebeshov, Ulttyq ǵylym akademııasynyń prezıdenti Aqylbek Kúrishbaev qatysty. Sondaı-aq onlaın formatta Ǵylym jáne joǵary bilim mınıstri Saıasat Nurbek, akademııa músheleri, joǵary oqý oryndarynyń basshylary, ǵalymdar men bıznes qaýymdastyq ókilderi qosyldy.
Jıynda «DeepBas» jobasynyń tanystyrylymy ótip, sý resýrstaryn basqarý, agroónerkásiptik keshendi damytý, ekologııalyq turaqtylyq, qaıta óńdeý salasyn ǵylymı súıemeldeý jáne taý-ken ónerkásibinde mıneraldyq shıkizatty keshendi qaıta óńdeý baǵytyndaǵy usynystar ortaǵa salyndy.
– Prezıdent ǵylymdy el damýynyń negizgi qozǵaýshy kúshi retinde aıqyndap, ǵylymı áleýetti arttyrýdy strategııalyq basymdyq dep ataǵan bolatyn. 2026–2030 jyldarǵa arnalǵan oblystyń damý josparyna jalpy óńirlik ónimdegi ǵylymı-zertteý jumystary shyǵyndarynyń úlesi arnaıy kórsetkish retinde engizildi. Oblys ákimdigi janynan ǵylymı keńes qurylyp, keshendi jumys jospary bekitildi, – dedi Danııar Janalınov.
Onyń aıtýynsha, keıingi úsh jylda ǵylymdy damytýǵa shamamen 4 mlrd teńge baǵyttalǵan. Byltyr ǵana bul salaǵa 1,3 mlrd teńge bólinip, 2020 jylmen salystyrǵanda qarjylandyrý kólemi bes ese artqan. Qazir óńirde 400-den astam maman ǵylymı-zertteý jáne tájirıbelik jumystarmen aınalysady.
Sonymen qatar Y. Jaqaev atyndaǵy Qazaq kúrish sharýashylyǵy ǵylymı-zertteý ınstıtýty jeti ǵylymı jobany júzege asyryp jatyr.
Basqosýda ǵylymı-zertteý ınstıtýttarynyń, ǵylymı-óndiristik ortalyqtardyń jáne joǵary oqý oryndarynyń jetekshileri sóz sóıledi. Nátıjesinde Qyzylorda oblysynda sý resýrstaryn basqarý, ekologııa, qaıta óńdeý jáne tamaq ónerkásibin damytýǵa baǵyttalǵan qarar men birlesken jumys josparyn ázirleý týraly sheshim qabyldandy.
Kóshpeli otyrys aıasynda forsaıt-sessııa uıymdastyrylyp, akademııa mamandary jergilikti kásiporyn ókilderine tehnologııalyq olqylyqtardy anyqtaý ádisterin úıretti. Sondaı-aq óńir kásiporyndarynda engizýge daıyn ınnovatsııalyq ázirlemeler kórmesi ótti.
