Qyzylordada gazdy zań talaptaryna saı eseptemegen kompanııaǵa aıyppul salyndy
ASTANA. KAZINFORM — Qyzylorda oblysynda gaz shyǵynyn esepke alý kezinde zań buzýshylyqtar anyqtaldy, dep habarlaıdy Saýda jáne ıntegratsııa mınıstrliginiń baspasóz qyzmeti.
QR SIM Tehnıkalyq retteý jáne metrologııa komıtetiniń Qyzylorda oblysy boıynsha departamenti «Krıstall Menedjment» AQ-da jospardan tys tekserý júrgizdi. Oǵan «Aqshabulaq» ken ornyndaǵy gaz shyǵynyn ólsheý júıesindegi yqtımal zańbuzýshylyqtar týraly ótinish negiz boldy.
Tekserý barysynda kompanııa paıdalanatyn gaz shyǵynyn ólsheý júıesi (esepke alý toraby) mindetti metrologııalyq attestattaýdan ótpegeni jáne ólshem birligin qamtamasyz etý júıesiniń memlekettik tizilimine engizilmegeni anyqtaldy.
Zańnamaǵa sáıkes mundaı júıeler mindetti túrde tekserýden ótkizilip, tirkelýge jatady. Olardy tıisti protsedýralarsyz paıdalaný taýarlyq gaz kólemin ólsheýdiń dáldigine kúmán keltirýi jáne baqylanbaıtyn shyǵyndarǵa ákelýi múmkin.
— Gazdy esepke alý júıesin sáıkestikti rastaýdyń mindetti rásimderinen ótkizbeı paıdalaný ólsheýlerdiń dáldigine kúmán keltiredi jáne jetkizilgen gazdyń naqty kólemi týraly derekterde alshaqtyqtarǵa ákelýi múmkin, — dep atap ótti tóraǵa orynbasary Baýyrjan Kasymov.
Tekserý qorytyndysy boıynsha «Krıstall Menedjment» AQ-na qatysty «Ólshem birligin qamtamasyz etý týraly» Zań talaptaryn buzý anyqtaldy. Kompanııa ákimshilik jaýapkershilikke tartyldy: 670 375 teńge kóleminde aıyppul salyndy. Sondaı-aq anyqtalǵan buzýshylyqtardy joıý týraly nusqama berildi.
Budan buryn Jetisýda eki jylda 13 eldi meken gazdandyrylatyny aıtyldy.
