Qyzylordada gaz, sý jáne jaryqtyń quny ósti
QYZYLORDA. KAZINFORM — Ótken jyly sýmen jáne jylýmen jabdyqtaý qyzmeti úshin áleýmettik tutyný normasy engizilip, elimizdiń birqatar óńirinde soǵan baılanysty tarıf bekitilgen bolatyn. Bul norma Qyzylorda oblysynda tek 2025 jyly qoldanysqa endi.
Tabıǵı monopolııalardy retteý komıtetiniń Qyzylorda oblysy boıynsha departamenti málimdegendeı, «Qyzylorda sý júıesi» kásipornynyń 2020-2024 jyldarǵa bekitilgen tarıf merzimi aıaqtalyp, taǵy 5 jylǵa uzaqmerzimdi tarıfti bekitti. Sóıtip, bıyl mamyr aıynan bastap sýmen jabdyqtaýdyń ortasha bosatý tarıfi qosylǵan qun salyǵynsyz 1 tekshe metr úshin 92,56 teńge bolyp belgilendi.
— Tutyný toptary arasynda bıýdjettik mekemeler men ózge de uıymdardyń tarıfi teńesti. Áleýmettik tutyný normalary naqtylandy. «QazaqGaz Aimaq» kompanııasy Qyzylorda óndiristik fılıalynyń usynysymen taýarlyq gazdy bólshek saýdada ótkizý baǵasy ózgerdi. Baǵa jeke tulǵalar, bıýdjettik jáne ózge uıymdar úshin 3,2%-ǵa, ataýly kómek alýshylar úshin úshin 11,3%-ǵa ósti. Strategııalyq taýarlar quny men óńirdegi ortasha aılyq nomınaldy jalaqynyń ózgerýine baılanysty taýarlyq gazdy gaz taratý jelileri arqyly berý tarıfi 1 shildeden bastap 0,5%-ǵa artty, — dedi departament basshysynyń orynbasary Zýra Sardarbek.
Jyl basynda óńirdi elektrmen jabdyqtaýshy birqatar mekeme qyzmetin toqtatyp, onyń ornyna tutynýshylarǵa «Qyzylorda elektr taratý toraptary» kompanııasy qyzmet kórsete bastady.
Elektr energııasyn satyp alý qunynyń, ortasha aılyq jalaqynyń kóterilgenin alǵa tartqan bul kompanııa da departamentke baǵany ósirýdi usyndy. Sonyń nátıjesinde jaryq tutynýshylar úshin tarıf 31,2%-ǵa joǵarylady. Qyzylordalyqtar 15 mamyrdan bastap qosylǵan qun salyǵyn qospaǵanda 1kVt/saǵat úshin 9,346 teńge tólep keledi.
Kazinform buǵan deıin tarıfterdiń ósý sebepteri men áleýmettik saldaryn sarapshylar pikiri men halyqaralyq tájirıbe negizinde taldaǵan bolatyn.