Qyzylordada esirtkini zańsyz jarnamalaıtyn 38 graffıtı jazýy joıyldy
QYZYLORDA. KAZINFORM – Qyzylorda oblysynda qoǵamdyq qaýipsizdikti qamtamasyz etý jáne quqyqbuzýshylyqtardyń aldyn alý maqsatynda «Qaýipsiz úı» jedel profılaktıkalyq is-sharasy ótip jatyr.
Oblystyq Polıtsııa departamenti habarlaǵandaı, shara barysynda 2446 problemalyq turǵyn úı men ózge de nysan tekserilip, kóshi-qon zańnamasyn buzýdyń 253 deregi anyqtaldy.
- Qala boıynsha sharýa qojalyqtary, qystaýlar men qysqy jaıylymdar, ıesiz qalǵan nysandar, saıajaı úıleri, kópqabatty úılerdegi páterler men jeke turǵyn úıler tekserildi. Jalǵa beriletin 100 páter tekserilip, turǵyndar arasynda profılaktıkalyq túsindirý jumysy ótti. Jaldamaly páterlerde anyqtalǵan zań buzýshylyqtar boıynsha memlekettik kirister organyna 30 aqparattyq hat joldandy, – dedi departamenttiń qoǵamdyq qaýipsizdik basqarmasy bastyǵynyń mindetin atqarýshy, polıtsııa polkovnıgi Raýan Áldeshov.
Kóshi-qon zańnamasynyń saqtalýyn tekserý nátıjesinde el aýmaǵynda zańsyz júrgen 240 sheteldik ákimshilik jaýapkershilikke tartyldy. Taǵy 13 adamdy Qazaqstan aýmaǵynan májbúrlep shyǵarý týraly materıaldar sotqa joldandy.
- Qarý aınalymyn baqylaý aıasynda 1335 qarý ıesi tekserildi. Saqtaý jáne tirkeý merzimi buzylǵan 19 qarý tárkilenip, zańsyz aınalymnan tirkelmegen 4 atys qarýy alyndy. Qoǵamdyq oryndarda esirtki zattaryn zańsyz jarnamalaıtyn 38 graffıtı jazýy joıyldy. Al kámeletke tolmaǵandardyń qaýipsizdigin qamtamasyz etý maqsatynda júrgizilgen túngi reıdter kezinde quqyqbuzýshylyqtarǵa qatysy bar 170-ke jýyq jasóspirim ishki ister organdaryna jetkizildi, - dedi Raýan Áldeshov.
Eske salaıyq, Jańaqorǵan aýdanynda jol qozǵalysy erejelerin óreskel buzyp, qaýipti manevr jasaǵan kortej qatysýshylary anyqtaldy.
