Qyzylordada eseptegishterdi tekserý salasyndaǵy monopolııalyq áreket toqtatyldy
QYZYLORDA. KAZINFORM — QR Básekelestikti qorǵaý jáne damytý agenttiginiń Qyzylorda oblysy boıynsha departamenti janyndaǵy taýar naryǵyna kirýdegi kedergilerdi anyqtaý jáne joıý jónindegi keńes 2020 jyly qurylǵan.
Sodan beri oblystyq keńes bızneske tán 62 problemany qarady. Onyń 12-si, ótken jyldyń, 6-y bıylǵy alǵashqy jarty jyldyń enshisinde.
— Biz sanıtarııalyq-epıdemıologııalyq talaptar, saraptamalyq uıymdardyń qyzmeti, ólsheý quraldaryn tekserý, suıytylǵan munaı gazyn taratý jáne memlekettik satyp alýǵa qatysty máselelerdi talqyladyq. Sonyń nátıjesinde agenttikke usynystar jiberildi. Keıbir máseleler áli de tıisti memlekettik organdardyń talqylaýynda. Respýblıkalyq kartaǵa sáıkes qazirgi ýaqytta el boıynsha ártúrli naryqta 35 kedergi bar. Qyzylorda oblystyq keńesi usynǵan jáne qoldaǵan eki másele ulttyq deńgeıde qarastyrylyp, olardy joıý baǵytynda jumys atqarylyp jatyr, — dedi keńes tóraǵasy Erik Teńizbaev.
Jergilikti kásipker keńeske Ulttyq saraptama jáne sertıfıkattaý ortalyǵynyń Qyzylorda fılıalyna qatysty shaǵymmen júgindi.
— Fılıal metrologııalyq quraldardy tekserý qyzmeti boıynsha naryq qatysýshysymen yntymaqtastyq týraly kelisim jasaýdan bas tartqan. Departament ótinishti qarap shyqqannan keıin fılıalǵa monopolııalyq jaǵdaıdy teris paıdalaný belgileri týraly habarlama jiberdi. Talap belgilengen merzimde oryndaldy. Osylaısha eseptegishterdi tekserý naryǵyndaǵy básekelesterdiń qyzmetin shekteýge jol berilmedi, — dedi keńes tóraǵasy.
Buǵan deıin habarlaǵanymyzdaı, Batys Qazaqstan oblysynda bıylǵy birinshi jartyjyldyqta básekelestikti qorǵaý salasynda zańnama talaptarynyń buzylǵany belgili boldy.
